काठमाडौं (हाम्रो खेलकुद) –काठमाडौं (हाम्रो खेलकुद) – मापदण्ड पुरा नभएका कारण नेपालका सबै १४ वटा ए डिभिजन क्लबको एएफसी क्लब लाइसेन्सको आवेदन अस्वीकृत भएको छ । 

अखिल नेपाल फुटबल संघ (एन्फा) अन्तर्गत रहेको क्लब लाइसेन्स कमिटिले ए डिभिजनका सबै क्लबको निवेदन अस्विकार भएको जनाएको छ ।
क्लब लाइसेन्सिङको मापदण्ड पुरा नगरेपनि गत वर्ष सिग्नेचर मनाङ मस्र्याङ्दी क्लबले एफसी कप खेल्न पाएको थियो । तर पछि एएफसीले एन्फालाई १० हजार अमेरिकी डलर जरिवाना गरेको थियो । मापदण्ड पुरा नभएपछि अब एएफसीले आयोजना गर्ने प्रतियोगितामा नेपाली क्लबले भाग लिन पाउने छैनन् ।

एन्फा क्लब लाइसेन्स कमिटि र फस्ट इन्सटेन्ट बडी (एफआइबी) को गत अक्टोवर २५ मा बसेको बैठकले नेपालको सबै १४ क्लबले ढिला गरी एएफसीमा आवेदन बुझाउको भन्दै अस्वीकार गरेको हो । एन्फाले यसवर्ष सबै १४ क्लबको लायसेन्स अस्वीकार गरेपनि अर्काे वर्षको लागि प्रक्रिया थालिने बताएका छन् ।

एन्फाले अर्काे वर्षको लागि राष्ट्रिय लिगमा सबै क्लबको प्रक्रिया पुरा गरेर एएफसीको क्लब लाइसेन्स प्रशासन पद्धति (सिएलएस) मा पठाउने निर्णय गरेको छ ।

यसवर्षको लागि मनाङ–मस्याङ्दी, थ्री स्टार, नेपाल पुलिस क्लब, जावलाखेल युथ क्लब, संकटा क्लब, फ्रेन्डस् क्लब, सरस्वती युथ क्लब, हिमालयन शेर्पा क्लब, ब्रिगेड ब्वइज क्लब, नेपाल एपीएफ क्लब, त्रिभुवन आर्मी क्लब, मच्छिन्द्र क्लब, न्युरोड टिम (एनआरटी) र च्यासल युथ क्लबले एएफसी क्लब लाइसेन्सका लागि आवेदन दिएका थिए ।