एजेन्सी –लन्डन क्लब चेल्सी इंग्लिस प्रिमियर लिगको अंक तालिकाको तेस्रो स्थानमा उक्लिएको छ । घरेलु मैदानमा क्रिस्टल प्यालेसलाई २–० ले पराजित गर्दै चेल्सी प्रिमियर लिगको तेस्रो स्थानमा उक्लन सफल भएको हो ।

प्रिमियर लिगमा लगातार छैटौ जित निकालेको चेल्सीको १२ खेलबाट २६ अंक रहेको छ । युवा खेलाडीले भरिएको चेल्सी लिभरपुलसँग छैटौ चरणमा २–१ ले पराजित भएयता, प्रिमियर लिगमा अपराजित रहेको छ ।

एक खेल कम खेलेको लिभरपुल ३१ अंक जोडेर शीर्षस्थानमा छ । एक खेल कम खेलेको म्यानचेस्टर सिटी २५ अंकसहित चौथो तथा २६ अंकसहित लेस्टर सिटी दोस्रो स्थानमा छ । प्रिमियर लिगमा आइतबार शीर्षस्थानको लिभरपुल र म्यानचेस्टर सिटीबीच प्रतिस्पर्धा हुदैछ ।

स्टामफोर्ड ब्रिजमा शनिबार भएको खेलमा चेल्सीलाई जिताउन ट्यामी अब्राहम र क्रिस्टियन पुलिसिसले गोल गरे । दुवै गोल दोस्रो हाफमा सम्भव भएको थियो । क्रिस्टल प्यालेसलाई घरेलु टोलीलाई पहिलो हाफमा गोलरहित बराबरीमा रोक्न सफल भएपनि दोस्रो हाफमा चेल्सीलाई रोक्न सफल भएन ।

५२औं मिनेटमा ट्यामीले विलियनको पासमा गोल गर्दै चेल्सीले अग्रता दिलाए । ७९ औं मिनेटमा पुलिसिसले गोल गर्दै चेल्सीलाई २–० को जित दिलाए । पराजित क्रिस्टल प्यालेस १५ अंकसहित १०औं स्थानमा छ ।