काठमाडौंं (हाम्रो खेलकुद)– घरेलु फुटबलमा विष्ट दाजु भाई रञ्जन र अन्जन फेरि एक पटक एउटै क्लबबाट खेल्ने भएका छन् । रुस्लान थ्री स्टार क्लब छाडेर रन्जन घरेलु फुटबलको सफल टोली सिग्नेचर मनाङ मर्स्याङ्दीमा आबद्ध भएसँगै समर्थकले दाजुभाईलाई फेरि एकपटक सँगै हेर्न पाउने भएका छन् ।

तीन वर्षअघि अन्जन र रन्जन दुवै एपिएफ क्लबमा आबद्ध थिए । एपिएफ छाडेर अन्जन मनाङ गएको अर्को वर्ष रन्जन पनि घरेलु फुटबलको अर्को सफल टोली थ्री स्टार गएका थिए । रन्जनले मनाङसँगै शुक्रबार सम्झौता गरेका थिए । अन्जनले भने हिजो सम्झौता नविकरण गरेको रन्जनले हाम्रो खेलकुदलाई बताएका छन् ।

मिडफिल्डर अन्जन राष्ट्रिय फुटबल टोलीका नियमित सदस्य हुन् । विश्व कप छनोटअन्तर्गत नेपालले अहिले सम्म ४ खेल खेलिसकेको छ । त्यसमध्ये एकमात्र खेल जित्दा दुवै गोल अन्जनले नै गरेका थिए । गत महिना चाइनिज ताइपेसँग नेपाली टोली २–० ले विजयी भएको थियो । त्यसबाहेकका खेलमा भने नेपाल कुवेतसँग ७–०, अष्ट्रेलियासँग ५–० र जोर्डनसँग ३–० ले पराजित भएको थियो । अर्को खेल नेपालले कुवेतसँग मंसिर ३ गते भुटानमा खेल्दैछ ।

दशरथ रंगशालामा खेलाउन मापदण्ड नपुग्ने एएफसीको ठहरपछि नेपालले कुवेतमा आफ्नो होम गेमका लागि प्रस्ताव गरेको थियो । दाजु रन्जनले भने पछिल्लो समय चोटका कारण राष्ट्रिय टोलीबाट मौका पाएका छैनन् । टोलीमा रहँदा पनि उनी वैकल्पिक खेलाडीका रुपमा रहन्थे । अहिले भने उनी टोलीबाट बाहिर छन् ।

भाईसँग खेल्न पाउने भएपछि रन्जन उत्साहित छन् । ‘नयाँ क्लब जाँदा त्यसै पनि उत्साह हुन्छ नै । त्यसमाथि पनि भाईसँग फेरि खेल्दा पाउँदा झन खुसी लागेको छ,’ रन्जनले भने । मनाङले अर्को महिना सुरु हुने लिगका लागि रन्जनलाई लिएको हो । सर्वाधिक सात पटक सहिद स्मारक ए डिभिजन लिग जितेको मनाङले नाइजेरियन फुजा टोपेलाई प्रशिक्षकका रुपमा पुनः भित्राएको बताएको छ ।