एजेन्सी – युवा फरवार्ड केलियन एमबाप्पेको उच्च प्रदर्शनसँगै उपाधि दावेदार फ्रेन्च क्लब पेरिस सेन्ट जर्मेन (पीएसजी) ले समूह ‘ए’ को विजेताको रुपमा युइएफए च्याम्पियन्स लिगको नकआउट चरणमा स्थान बनाएको छ । बुधबार राति भएको खेलमा टर्किस क्लब गालाटासारेमाथि ५–० को सानदार जित निकाल्दै समूह विजेताको रुपमा अन्तिम १६ मा पुग्न सफल भएको हो । 

घरेलु मैदानमा पीएसजीको सानदार जितमा ५ खेलाडीले गोल गरे । एकपक्षीय खेलमा पीएसजीले पहिलो हाफमा २ तथा दोस्रो हाफमा ३ गोल गर्न सफल भएको थियो । पीएसजीको ५ गोलमध्ये एमबाप्पेले एक गोल गर्नुका साथै दुई गोलको लागि असिस्ट दिएका थिए ।

पाहुना टोलीलाई दवावमा राखेपनि पीएसजीले पहिलो गोलको लागि ३२औं मिनेट कुर्नुपरेको थियो । केलियन एमबाप्पेको मोउरो इकार्डीले गोल गर्दै पाहुना टोलीलाई अग्रता दिलाएका थिए । ३५औं मिनेटमा पाब्लो सारावियाले गोल गर्दै पीएसजीलाई पहिलो हाफमा २–० ले अघि बढाए ।

४७औं मिनेटमा एमबाप्पेको पासमा नेयमारले गोल गर्दै पीएसजीलाई सानदार जिततर्फ अघि बढाए । ६८औं मिनेटमा नेयमारको पासमा एमबाप्पेले गोल गर्दै पीएसजीले खलेमा ४–० को आरामदायी अग्रता लिन सफल भयो ।

८४औं मिनेटमा एडिन्सन काभानीले पेनाल्टीमा गोल गर्दै पीएसजीलाई ५–० को सानदार जित दिलाए । जितसँगै अपराजित रहेको पीएसजीले ६ खेलबाट १६ अंक जोड्यो । पीएसजीले समूहमा ५ खेलमा जित र १ मा बराबरीको नतिजा निकालेको थियो ।

यो समुहबाट स्पेनिस क्लब रियल मड्रिडले उपविजेताको रुपमा नकआउट चरणमा पुग्न सफल भयो । रियलले ६ खेलबाट ११ अंक जोड्यो । क्लब ब्रगले ३ तथा गालाटासारेले २ अंक जोड्दै समूह चरणबाटै बाहिरियो ।