एजेन्सी – नेपाली राष्ट्रिय टोलीका मिडफिल्डर रोहित चन्द सम्मिलित पर्सिजा जाकर्ताले इन्डोनेसियन लिग वानमा फराकिलो जित निकालेको छ । घरेलु मैदानमा पर्सिजाले मधुरा युनाइटेडमाथि ४–० को फराकिलो जित निकालेको हो ।

पर्सिजाको जितमा मार्काे सिमिकले ह्याट्रिक पुरा गर्दा लेस्टालुहुले एक गोल थपे । सिमिकले तीनै गोल पेनाल्टीमार्फत गोल गरे । सबै चार गोल पहिलो हाफमा सम्भव भएको थियो ।

खेलको २१औं मिनेटमा सिमिकले पेनाल्टीमार्फ गोल गर्दै पर्सिजालाई अग्रता दिलाए । २६औं मिनेटमा लेस्टालुहुले गोल गर्दै अग्रता दोब्बर पारे । २९औं मिनेट सिमिमले पुन पेनाल्टीमा गोल गरेपछि पर्सिजाले खेलमा ३–० को आरामदायी अग्रता लिन सफल भयो ।

इन्ज्युरी समयको थप गरिएको दोस्रो मिनेटमा सिमिकले पुनः पेनाल्टीमार्फत गोल गर्दै ह्याट्रिक पुरा गरेपछि पर्सिजाले पहिलो हाफमा ४–० को सहज जिततर्फ अग्रसर बन्यो ।

दोस्रो हाफमा दुवै टोलीले केही गोलको अवसर पाएपनि सदुपयोग गर्न नसक्दा पहिलो हाफको ४ गोल नै पीएसजीको जितमा पर्याप्त बन्यो । रोहितले पुरै समय मैदानमा बिताएका थिए ।

जितसँगै अघिल्लो वर्षको च्याम्पियन पर्सिजाले ३२ खेलबाट ४१ अंक जोडेर १२औं स्थानमा उक्लिएको छ । पराजित मधुरा ४७ अंकसहित पाँचौ स्थानमा छ ।