काठमाडौं (हाम्रो खेलकुद) – दुवै फरवार्डले ह्याट्रिक गरेपछि त्रिभुवन आर्मी क्लबले सातौं प्रधानसेनापति महिला फुटबल प्रतियोगिताको उद्घाटन खेलमा प्रदेश नं १ माथि ९-० को फराकिलो जित दर्ता गरेको छ ।

आर्मीको जितमा रश्मीकुमारी घिसिङ र शर्मिला थापामगरले ह्याट्रिक गर्नुका साथै विमला चौधरीले २ तथा सपना लामाले १ गोल गरिन् । पहिलो हाफमा ५-० को अग्रता लिएको आर्मीले दोस्रो हाफमा ४ गोल थपेको थियो । कमजोर प्रदेश १ माथि आर्मीले दोस्रो मिनेटमा नै गोल गर्दै दवाव बनाएको थियो ।

रश्मीले गोलको खाता खोलेपछि शर्मिलाले ३ मिनेटको अन्तरमा २ गोल गरिन् । उनले सातौं र दशौँ मिनेटमा गोल गरेकी थिइन् । त्यसपछि लगातार गोल गर्ने अवसरमा चुकेको आर्मीले ४२ औं मिनेटमा सपना लामाको गोलमा अग्रता बढायो । विमला चौधरीले ४५ औं मिनेटमा गोल गर्दै पहिलो हाफको स्कोर ५-० बनाइन् ।

दोस्रो हाफमा पनि आर्मी यसै रोकिएन । ५८ औं मिनेटमा शर्मिलाले गोल गर्दै ह्याट्रिक पूरा गरिन् । ६५ औं मिनेटमा रश्मीले दोस्रो गोल गर्दा विमलाले ७४ औं मिनेटमा विमलाले पनि गोल थपिन् । खेलको ७ मिनेट बाँकी रहँदा रश्मीले गोल गर्दै आफ्नो ह्याट्रिक पूरा गरिन् । आर्मीकी अनुभवी फरवार्ड शर्मिला खेलको प्लेयर अफ द म्याच भइन् ।

वर्षेनी हुँदै आएको प्रधानसेनापति कपमा यसपटक २ विदेशीसहित कुल ८ टोलीको सहभागिता रहेको छ । आर्मीले समूह ए मा विजयी सुरुवात गर्दै ३ अंक जोडेको छ । यसै समूहमा एपीएफ र सिक्किम पनि रहेका छन् । अर्को समूहमा नेपाल पुलिस क्लब, भुटान, प्रदेश २ र प्रदेश ५ रहेका छन् । शीर्ष २ टोलीले सेमिफाइनलमा स्थान बनाउनेछन् ।