काठमाडौं (हाम्रो खेलकुद)– अनुशासन उल्लघंन गरेको भन्दै अखिल नेपाल फुटबल संघ (एन्फा) को कारवाहीमा परेका विमल घर्तीमगरसहितका ४ खेलाडीले कारवाही घटाउन माग गर्दै एन्फाको अपिल कमिटीमा निवेदन दिएका छन् ।

एन्फाले शुक्रबार विमल र दीनेश राजवंशीलाई ९० दिन तथा अन्जन विष्ट र सन्तोष तामाङलाई ४५ दिनको निलम्बनको कारवाही गरेको थियो । शुक्रबारदेखि नै कारवाही लागु हुने एन्फाको विज्ञप्तीमा उल्लेख छ । सबै जनालाई ५० हजार जरिवाना पनि तोकिएको थियो ।

चारै जनाले आफुहरुले गल्ति गरेको र त्यसको सजाय पनि भोगेको उल्लेख गर्दै सोमबार निवेदन दिएको एन्फा श्रोतले जनाएको छ । ‘अब यस्तो गल्ति दोहोराउँदैनौं । त्यसका लागि कारवाही घटाउँदै लिग खेल्न पाउ भन्ने आयश छ,’ श्रोतले भन्यो,‘ अब यो विषयमा अपिल कमिटीमा छलफल हुनेछ ।’

मंसिर ३ गते कुवेतसँगको विश्व कप छनोट खेल्नका लागि भुटान जानुअघि अघिल्लो राती डिस्को गएर मादक पदार्थ सेवन गरेको भन्दा समाचार सार्वजनिक भएपछि एन्फाले कारवाही गरेको थियो । भुटानका लागि ४ खेलाडी एन्फा पुगेपनि कारवाही सुनेपछि उनीहरु घर फर्केका थिए ।

त्यसको निरन्तरताका रुपमा एन्फाले थप कारवाही गरको हो । एन्फाको कारवाहीमा यथावत रहेमा अन्जन र सन्तोषले कतार ऐयरवेज सहिद स्मारक ए डिभिजन लिगको सुरुवाती डेढ महिनाको खेल गुमाउनेछन् । अन्जन लिग च्याम्पियन सिग्नेचर मनाङ मस्र्याङ्दीका मुख्य खेलाडी हुन् । त्यस्तै सन्तोषले आर्मीको मिडफिल्ड सम्हाल्दै आएका छन् । दुवै खेलाडीले लिगको अन्तिम ४ खेल मात्र खेल्न पाउनेछन् ।

दीनेशले भने अझै ३ महिना लिगको खेलमा गुमाउनेछन् । त्यसको अर्थ उनले लिगका सबै खेल गुमाउनेछन् । उनी यहि सिजन रुस्लान थ्री स्टार क्लब छोडेर च्यासल युथ क्लबसँग अनुबन्धन गरेका थिए । उनले यसै महिना सम्पन्न चन्द्रागिरी गोल्डकप पनि खेलेका थिए ।

विमलको हकमा भने उनी माल्दिभ्सको लिग खेलिरहेका कारण एन्फा अन्तर्गत प्रतियोगितामा मात्र कारवाही हुनेछ । यसबीचमा राष्ट्रिय टोली अथवा अन्य कुनै प्रतियोगिता भएको खण्डमा विमल सहभागी हुने छैनन् । विमलले पछिल्लो समय माल्दिभ्सको शीर्ष डिभिजनको क्लब टीसी स्पोट्र्सबाट खेल्दै आएका छन् ।