प्रकाश तिमल्सिना,काठमाडौं

 च्यासल युथ क्लबका कप्तान सन्तोष साहुखल सहिद स्मारक ए डिभिजन लिगमा सय गोल गर्ने पहिलो खेलाडी बनेका छन् । दशरथ रंगशालामा उनले बुधबार नेपाल पुलिस क्लबविरुद्ध १८ औं मिनेटमा गोल गर्दै लिगमा एक सयौं गोल पुरा गरेका हुन् । हेमन्त थापामगरको फ्रिकिकलाई विपक्षी गोलकिपरले राम्ररी नियन्त्रणमा लिन नसकेपछि नजिक रहेका सन्तोषले वान टचमा बराबरी गोल गरेका थिए । त्यसअघि पाँचौं मिनेटमा निरकुमारको गोलबाट पुलिसले खेलमा अग्रता लिएको थियो । 

 

डेढ दशक अघिबाट लिग खेल्न सुरु गरेको सन्तोषले यो समेत दस वटा ए डिभिजन लिग खेलेका छन् । अखिल नेपाल फुटबल संघ (एन्फा) को आन्तरिक विवादका कारण बीच बीचमा लिग रोकिदा उनले सय गोल पुरा गर्न डेढ दशक भन्दा बढी कुर्नुपरेको थियो ।

लिगमा ५० गोल पुरा गर्नेमा सन्तोषसँगै राष्ट्रिय टोलीका पूर्व खेलाडी बसन्त थापा, रमेश बुढाथोकी, सुरेन्द्र तामाङ र जेविश पाण्डे छन् । सन्तोषले स्कुले जीवनदेखि ‘ए’ डिभिजन लिग खलेका थिए । सन्तोषले २०६० असार १० गते संकटाविरुद्धको ३–२ ले पराजित भएको लिगको खेलमा ‘डेब्यु’ गोल गरेका थिए । यस सिजन लिगमा सुरुवाती दुई खेलमा ३ गोल गर्दै सन्तोषले आफ्नो क्षमता देखाइसकेका थिए । पछिल्ला दुई खेलमा भने उनी गोल विहिन रहे ।

२०६० देखि ‘ए’ डिभिजन लिग खेल्न थालेको सन्तोषले डेढ दशकमा चार क्लबको जर्सी लगाए । च्यासल उनको चौथो क्लब हो । त्यसअघि रुस्लान थ्रीस्टार, एपीएफ र मनाङ मस्र्याङ्दि क्लबबाट नेपालको शीर्ष श्रेणीको लिग खेले ।

यो सिजन उनीसँग जोडिएको अर्को संयोग पनि छ । सहोदर दाजु बालगोपाल साहुखलले च्यासलको प्रशिक्षण सम्हालिरहँदा सन्तोष टोलीको कप्तान छन् । २०६० मा सँगै क्लब करियर सुरु गरेका भाइको खेलबाट दाई पनि खुसी छन् ।

‘समग्रमा यो लिगमा राम्रो प्रदर्शन गरिएको छ । दुई खेलमा तीन गोल गरिसकेको छ ,’ बालगोपालले भाईको बारेमा भनेका थिए,‘ नम्बर ९ अर्थात् स्ट्राइकरमा हुनुपर्ने क्षमता अहिले सन्तोषबाहेकको नेपाली खेलाडीमा देखिएको छैन ।’

पाँच वर्षदेखि जापान बस्दै आएका सन्तोष जापनमा एनपीओ रिलेमा खेलाडी र प्रशिक्षकका रूपमा कार्यरत छन् । उनको टिम एसएस इजु जापानको आठौं श्रेणीको लिग जे ८ मा खेल्छ । त्यसले पनि आफुलाई फिट रहन मद्दत गरेको सन्तोषले बताएका थिए ।

 

लिगमा सन्तोषको गोल

२०६० – (थ्री स्टार, ६ गोल)

२०६१ – (एपीएफ, ६ गोल)

२०६२ – (थ्री स्टार, ९ गोल)

२०६३ – (थ्री स्टार, ११ गोल)

२०६६–६७ – (थ्री स्टार, १९ गोल)

२०६८ – (मनाङ, १६ गोल)

२०६९ – (थ्री स्टार, १७ गोल)

२०७० – (थ्री स्टार, ९ गोल)

२०७५ – (च्यासल, ३ गोल) ५ खेल

२०७६ – (च्यासल, ४ गोल) खेल जारी