दिपक न्यौपाने, बुटवल

सातौं फर्साटिकर कप फुटबल प्रतियोगिताको भैरव एफसीले विजयी सुरुवात गरेको छ । फर्साटिकर उच्च माविको मैदानमा भएको खेलमा भैरवले सालझण्डीको विश्व शान्ति युवा क्लबलाई ५–० ले हराएको छ ।

भैरव एफसीका लागि विनोद केवटले ह्याट्रिक गरे भने कप्तान रामबहादुर थापाले २ गोल गरे । विजयी टोलीका विनोद म्यान अफ दी म्याच घोषित भए र उनले २ हजार रुपैयाँ प्राप्त गरे । रुपन्देही, नवलपरासी, चितवन र पाल्पाका गरी कुल १६ टोलीले प्रतियोगितामा भाग लिएका छन् ।

प्रतियोगितामा शनिबार पाल्पा ११ र सौराहा युवा समाज चितवका बीच प्रतिस्पर्धा हुने संयोजक भेषराज पौडेलले जानकारी दिए । शुदोधन गाउपालिकाका प्रमुख किसुनचन्द चौधरीले प्रतियोगिताको उद्घाटन गरे । शुद्धोदन गाउँपालिकाको मुख्य प्रायोजना रहने प्रतियोगिताको विजेताले २ लाख र दोस्रो हुने टोलीले १ लाख रुपैयाँ प्राप्त गर्ने आयोजक फर्साटिकर युवा क्लबका अध्यक्ष मुकेश कुँवरले बताए ।

प्रतियोगिताको सेमिफाइनलमा पुग्ने टोलीले समान १६ हजार रुपैयाँ प्राप्त गर्नेछन् । प्रतियोगिताका सर्वोत्कृष्ट खेलाडीले १० हजार तथा व्यक्तिगत विधातर्फ उत्कृष्ट खेलाडीले समान ५ हजार रुपैयाँ प्राप्त गर्नेछन् । जिल्लाका युवा खेलाडीको क्षमता र स्तर बृद्धिलाई थप उचाई प्रदान गर्न प्रतियोगिता फलदायी हुने अध्यक्ष कुँवरको दाबी छ । प्रतियोगिताको फाइनल पुस २६ गते हुने छ । शुदोधन गाँउपालिकका अध्यक्ष चौधरीले फर्साटिकर कप गाँउपालिकाको गहना भएको बताए ।