काठमाडौं (हाम्रो खेलकुद)– रुस्लान थ्री स्टार क्लबले नेपाल एपिएफ क्लबविरुद्ध कतार एयरवेज सहिद स्मारक ए डिभिजन लिगको पहिलो हाफमा १–० को अग्रता लिएको छ ।

दशरथ रंगशालामा थ्री स्टारले रक्षक अनन्त तामाङको गोलमा खेलको १५ औं मिनेटमा अग्रता लिएको थियो ।
मिक्छेन तामाङले झन्डै २५ यार्ड टाढाबाट प्रहार गरेको फ्रिकिकमा अनन्तले हेड गोल गरेका थिए । सुमन श्रेष्ठलाई एपिएफका खेलाडीले फाउल गरेपछि थ्री स्टारले फ्रिकिक पाएको थियो ।

त्यसअघि एपिएफका प्रविण स्याङ्तानले प्रहारलाई थ्री स्टारका विदेशी गोलरक्षक प्रिसोले जोगाएका थिए । १० औं मिनेटमा थ्री स्टारका सुशील राईको पासमा हम्जाताको प्रहार पोष्ट नजिकबाट बाहिएको थियो ।

३०अाैं मिनेटमा मिक्छेनको कर्नरमा कप्तान विक्रम लामाको हेडर बाहिरियाे । ३६अौं मिनेटमा दिपेश घलेकाे बक्स बाहिरको सशक्त प्रहार क्रस बारमा लागेर बाहिरिदा थ्री स्टारले अग्रता दाेब्बर पार्ने अवसर खेर फाल्याे ।

पहिलो खेलमा जावलाखेलविरुद्ध गोलरहित बराबरीमा रोकिएको थ्री स्टारले दोस्रो राउन्डमा विभागीय नेपाल पुलिस क्लबको चुनौती १–० ले पाखा लगाएको थियो । एपिएफले भने अघिल्ला दुई खेलमा जित हासिल गर्न सकेको छैन ।

पहिलो खेलमा साविक विजेता मनाङ मस्र्याङ्दी क्लबसँग २–० ले पराजित भएको एपिएफ दोस्रो खेलमा यति हिमालयन शेर्पासँग १–१ गोलको बराबरीमा रोकिन पुगेको थियो ।
मनाङ ९ अंकसहित शीर्षस्थानमा छ । आजको खेल जितेमा थ्री स्टार दोस्रो स्थानमा उक्लनेछ ।