एजेन्सी – प्रशिक्षक डेभिड मोएर इंग्लिस क्लब वेष्ट ह्याम युनाइटेडमा फर्किएका छन् । वेस्ट ह्यामले डेभिड मोएसलाई आइतबार राति पुनः मुख्य प्रशिक्षकमा नियुक्त गरेको हो ।

मोएसले यसअघि २०१७/१८ को सिजनमा ७ महिना क्लबको मुख्य प्रशिक्षक बनेको थियो । खराव प्रदर्शनसँगै उनी बर्खास्तीमा परेको थियो । तर, यसपटक वेस्ट ह्यामले पुनः मोएसलाई नै मुख्य प्रशिक्षक नियुक्त गरेको हो । उनको सम्झौता १८ महिनाको रहेको छ ।

प्रिमियर लिगमा शनिबार राति लेस्टर सिटीसँग २–१ ले पराजित भएपछि वेस्ट ह्यामले प्रशिक्षक म्यानुएल पेलेग्रेनीलाई बर्खास्त गरेको थियो । लगत्तै वेस्ट ह्यामले मोएसलाई प्रशिक्षक बनाउने तयारी गरेको थियो ।  इंग्लिस क्लब म्यानचेस्ट युनाइटेड र एभर्टनका पुर्व प्रशिक्षक समेत रहेका मोएसको सहयोगी प्रशिक्षकमा पियर्स र इर्भिन रहेका छन् ।

वेस्ट ह्याममा फर्किएसँगै मोएसले क्लबको आधिकारिक वेवसाइटमा पुनः फर्कन पाउदा खुशी रहेको र घरमै आएजस्तो अनुभव भएको बताएका छन् । ‘मलाई घर नै फर्किए जस्तो अनुभुति भइरहेको छ । मैले यहाँ निकै रमाइलो पल बिताएको थिए । विगतमा के भयो त्यसमा भन्दा पनि अबको गन्तव्य बारे सोच्नुपर्ने हुन्छ ।’ मोएसले भने, ‘क्लबका लागि मेरो तर्फबाट सक्ने माथि ल्याउने कोसिस गर्नेछु । मैले क्लबलाई दिन सक्ने सबै गर्नेछु ।’

मोएसको प्रशिक्षणमा वेस्ट ह्याम युनाइटेडले १ जनवरीमा बर्नमाउथसँग खेल्दैछ । वेस्ट ह्याम १९ खेलबाट १९ अंक जोडेर रेलिगेसन जोनभन्दा एक स्थान माथि छ ।