पोल्यान्डलाई पेनाल्टि सुटआउटमा ५-३को गोलअन्तरले हराउँदै पोर्चुगल जारी युरो २०१६को सेमिफाइनलमा पुग्ने पहिलो टोली भएको छ।
खेलको निर्धारीत ९०मिनेट १-१ गोलको बराबरीमा सकिएको र थप ३० मिनेटमा पनि दुवै तर्फबाट गोल हुन नसकोपछि खेल सुटआउटतर्फ धकेलिएको थियो। सुटआउटमा पोल्यान्डका ज्याकुब ब्लाजिकोस्किको प्रहार मात्र गोलमा परिणत हुन सकेन।
खेलको दोश्रो मिनेटमा नै गोल गर्दै रोबर्ट लेवानडोस्कीले पोल्यान्डलाई अघि बढाएका थिए, तर रेनाटो स्यान्चेसले ३३औं मिनेटमा पोर्चुगलका लागि बराबरी गोल फर्काए। त्यसपछि दुवै टोलीका आक्रमण गोलमा परिणत हुन सकेन।
सुटआउटमा पोर्चुगलका लागि क्रमश: क्रिस्टियानो रोनाल्डो, रेनाटो स्यान्चेस, जोआओ मोउटिन्ह्यो, नानी र रिकार्डो क्वारेज्माले गोल गरेका थिए। पोल्यान्डका सुरुका तिन पेनाल्टि छिरे पनि चौथो भने गोल हुन सकेन। रोबर्ट लेवान्डोस्कि, अर्कास्डियुज मिलिक र कामील गिल्कले पेनाल्टि छिराएका थिए।
पोर्चुगलले अब सेमिफाइनलमा आज हुने वेल्स र बेल्जियमविचको खेलको विजेतासंग खेल्नेछ।
