लमजुङ (हाम्रो खेललकुद)- श्री भगवती युथ क्लब टोखा काठमाडौं र समाज कल्याण काठमाडौं लमजुङमा जारी जिल्लाको सर्वाधिक धनराशिको २८औं संस्करणको त्रिवेणी कप खुल्ला राष्ट्रिय पुरुष फुटबल प्रतियोगिताको सेमिफाइनलमा प्रवेश गरेको छ ।

सदरमुकाम बेशिसहरस्थित सहजी खेल मैदानमा बुधबार भएको पहिलो क्वाटरफाइनलमा समाज कल्याणले बन्सार एकता युथ क्लबमाथि १–० को जित निकाल्दै अन्तिम चारको यात्रा तय गर्न सफल भएको हो । बुधबारै भएको दोस्रो क्वाटरफाइनलमा श्री भगवती युथ क्लब टोखाले बुद्ध युथ क्लब (बीवाइसी भोटेवडारलाई २–० ले पराजित गर्दै सेमिफाइनलमा पुग्न सफल भयो ।

प्रतियोगितामा बिहीबारदेखि क्वाटरफाइनलका अन्तिम दुई खेलहरु हुनेछ । पहिलो खेलमा आयोजक त्रिवेणी युवा क्लब ‘हरियाे’ र दोर्दी गाँउपालिका लमजुङबीच बिहान १० बजे खेल हुनेछ । दोस्रो खेलमा लमजुङ मस्र्याङ्द युथ क्लब र सामना युथ क्लब तुरतुरे तनहुँबीच दिउँसो १ बजे खेल हुने आयोजक त्रिवेणी युथ क्लबले जानकारी गराएको छ ।

१२ पुसबाट शुरु भएको राष्ट्रव्यापी प्रतियोगितामा देशभरका २० क्लबले प्रतिस्पर्धा गरिरहेका छन् । प्रतियोगिताको विजेताले ३ लाख र दोस्रो हुनेले १ लाख ५० हजार रुपैया हात पार्नेछन् । सेमिफाइनलमा पराजित हुने दुई टोलीले समान ५० हजार पाउनेछन् । सर्वाधिक गोलकर्ता र सर्वोकृष्ट खेलाडीले जनही १५–१५ हजार हात पार्नेछन् ।