फ्रान्समा आयोजना भैरहेको युरो २०१६ अन्तर्गत सेमिफाइनलमा पुग्न आज हुने दोश्रो क्वार्टरफाइनल खेलमा बेल्जियम र वेल्स भिड्दैछन।

प्रि-क्वार्टरफाइनल चरणमा हंगेरीविरुद्ध ४-०को सहज जीत हात परेको बेल्जियमका लागि एडेन हजार्डले लोभलाग्दो प्रदर्शन गरेका थिए। बेल्जियमका नियमित कप्तान भिन्सेन्ट कम्पनि चोटका कारण प्रतियोगिताबाट बाहिरिएपछि कप्तानीको जिम्मेवारी पाएका हजार्डसंगै केभिन डे ब्रुएन पनि लय समात्दै छन्। तर टोलीलाइ क्वार्टरफाइनल खेलका लागि दुइ डिफेन्डर नहुने कुराले भने केहि कठिन हुने पक्का छ। थोमस भर्मालेन प्रतिबन्धमा परेकोले यसअघिनै नखेल्ने पक्का थियो र अर्का स्टार डिफेन्डर यान भर्टोङ्गन एंकलको चोटका कारण उपलब्ध रहने छैनन्। म्यानचेस्टर सिटीका जेसन डीनाएर र रोमेलु लुकाकुका सहोदर भाइ जोर्डन लुकाकुले डिफेन्समा पदपूर्ति गर्नेछन्।

उता वेल्सका लागि भने कप्तान एवं डिफेन्डर एश्ली विलिएम्स चोटमुक्त भएको खबरले थप उर्जा प्रदान गरेको छ। उत्तरी आएरल्याण्ड विरुद्धको खेलमा अन्त्यतिर पाखुरामा चोट बोकेका उनले हिजो मात्र पूर्ण रुपमा ठिक भएको संकेत दिएका छन्। वेल्सका लागि तिन गोल गरेका ग्यारेथ बेल टोलीलाई पहिलो पटक कुनै प्रतियोगिताको सेमिफाइनलमा पुर्याउन आतुर देखिन्छन्।

यस क्वार्टरफाइनल खेलमा विजय हासिल गर्ने टोलीले सेमीफाइनलमा पोर्चुगलको सामना गर्नेछ। यसअघि भएको क्वार्टरफाइनलमा पोर्चुगलले पोल्याण्डलाई पेनाल्टीमा ५-३ले पाखा लगाएको थियो।