काठमाडौँ (हाम्रो खेलकुद) – फ्रान्समा जारी युरो २०१६ अन्तर्गत आज हुने तेश्रो क्वार्टरफाइनल खेलमा इटाली र जर्मनी भिड्दै छन्।

अनौठो लाग्न सक्छ तर इटालीले जर्मनीविरुद्ध ठुला प्रतियोगितामा खेलेको आठ खेलमा कुनै खेल हारेको छैन। तर आज हुने खेलमा सोहि रेकर्डलाई जारि राख्न भने इटालीको लागि ठुलो चुनौती हुनेछ। ड्यानीएले डे रोसी चोटका कारण अनुपस्थित हुने पक्का भएपछि एन्टोनियो कोन्टेलाइ टोलि छनोटमा केहि टाउको दुखाई भने अवश्य हुनेछ।

इटालीको लागि अर्को चटारो के पनि हुनेछ भने उनीहरुका एघार खेलाडी पहेंलो कार्ड बोकेर बसेका छन्। आजको खेलमा जित हात पारेर पहेंलो कार्ड खाएमा ति खेलाडीहरुले सेमिफाइनल गुमाउने डर पनि उत्तिकै छ। इटलीका थियागो मोट्टा र अन्टोनियो क्यानड्रेभा पनि आजको खेलमा उपस्थित नहुने पक्का छ। यस्तो अवस्थामा कोन्टेले स्टुरारोलाई मिडफिल्डमा खेलाउन सक्ने सम्भावना बढेको छ।

उता जर्मनीका लागि भने खेलाडीहरु सबै उपलब्ध र फिट भएकाले छनोटमा समस्या परेको छ। गोट्जेले लगातार राम्रो प्रदर्शन गर्न नसकेपछि आएका जुलिएन ड्रयाक्सलरले आफ्नो स्थान जमाएका छन् भने डिफेन्समा बेनेडीक्ट हावडेस उत्रिने सम्भावना रहेको छ।

खेल नेपाली समयानुसार रातको १२:४५बजे सुरु हुनेछ।