पोखरा (हाम्रो खेलकुद)–गण्डकी प्रदेशका सांसद दीपक मनाङेको नामले परिचित राजीव गुरुङ पक्राउ परेको भोली पल्ट शुक्रबार अखिल नेपाल फुटबल संघ –एन्फा) कास्कीका अध्यक्ष मिलन गुरुङ पनि पक्राउ परेका छन् ।

एन्फा अध्यक्ष गुरुङको उजुरीका आधारमा प्रहरीले बिहीबार सांसद मनाङेलाई पक्राउ गरेको थियो । एन्फा अध्यक्ष गुरुङ भने बैंकिङ कसुरमा गैरा पाटनबाट पक्राउ परेको कास्की जिल्ला प्रहरी प्रमुख दानबहादुर कार्कीले जानकारी दिएका छन् । ओम गौरा जोस्तेल प्रालिका हरि भक्त आचार्यको जहेरीमा प्रहरीले एन्फा कास्कीका अध्यक्ष गुरुङलाई पक्राउ गरेको हो । गुरुङविरुद्ध क्रियटिभ अवार्ड हाउसका सन्चालक रामकृष्ण पौडेलले पनि उजुरी दर्ता गराएका थिए।

एन्फा अध्यक्ष बनेदेखि नै मिलन गुरुङ विवादमा पर्दै आएका छन् । आइतबार गुरुङले पोखरा क्रियटिभ अवार्ड हाउसका सञ्चालक पौडेलमाथि हातपात गरेका थिए । गुरुङले भने तोकिएभन्दा बढी मूल्यमा सामान बेचिरहेको र त्यसबारे कुरा राख्दा पसल धनी पौडेलले आइलाग्न खोजेपछि आफूले प्रतिवाद मात्र गरेको दाबी गरेका थिए । पौडेलले भने गत वर्ष एन्फा कास्कीले नै सञ्चालन गर्ने मनकामना केबुलकार कपको करिब १२ लाख रुपैयाँ बक्यौता रहेको र रकम माग गर्दा आफूमाथि जाइलागेको बताएका थिए।

गुरुङले हालै मंसिरमा सम्पन्न १३ औं दक्षिण एसियाली खेदकुद (साग) अन्तर्गत पोखरामा भएको खेलमा पनि प्रदेश सांसद मोहन रेग्मीसँग झगडा गरेका थिए । सागमा खटिएका प्रहरीले नै उनीहरुलाई छुट्याउनु परेको थियो । एन्फा कास्कीले गर्दै आइरहेको मनकामना केबुलकार कपमा पनि हिसाबकिताब नदेखाएको र १ वर्षसम्म हिसाब बक्यौता राखेको भन्दै गुरुङ विवादमा तानिदै आएका छन् । अहिले मुख्यमन्त्री कपका विषयमा गण्डकी सांसद दीपक गुरुङ र एन्फा कास्कीका अध्यक्ष गुरुङबीच विवाद सुरु भएको थियो ।