अर्जुन कार्की, बागलुङ

आयोजक बागलुङ नगरपालिका र तनहुँको भिमाद नगरपालिका दोस्रो मेयर कप राष्ट्रिय फुटबल प्रतियोगिताको सेमिफाइनलमा पुगेका छन् । दाङको तुलसीपुर नगरपालिकाबाट वाकओभर पाउँदै भिमाद अन्तिम चारमा पुगेको हो ।

बागलुङले आफ्नै जिल्लाको गल्कोट गरपालिकालाई ७–० ले हराउँदै सेमिफाइनलमा स्थान पक्का गरेको हो । विजयी टोलीका लागि ध्रुब घिमिरले ४, आशिष केसी, गोविन थापा र आशिष केसीले गोल गरे । खेलको ३१ औं मिनेटमा कप्तान प्रमेश थापालाई परिवर्तन गर्दै मैदान प्रवेश गरेका आशिषले ३९ औं मिनेटमा गोल गर्दै टोलीलाई अग्रता दिलाएका थिए ।

गोविनले ४२ औं मिनेटमा गोल गर्दा बागलुङले पहिलो हाफमा २–० को अग्रता बनाएको थियो । ध्रुबले खेलको ५७ औं, ६२ औं र ६८ औं मिनेटमा पेनाल्टीबाट गोल गर्दै ह्याट्रिक पुरा गरे । उनले ७२ औं मिनेटमा अर्को गोल थपे । इन्ज्युरी समयमा आशिषले गोल थपे । ध्रुब खेलेको म्यान अफ दी म्याच बनेर उनले २ हजार रुपैयाँ प्राप्त गरे ।

पहिलो हाफमा बागलुङका खेलाडीले पेनाल्टी बक्समा फाउल गेपछि गल्कोटले पेनाल्टी पाएको थियो । तर, कप्तान जीवन बुढाथोकीको प्रहार बागलुङका गोलरक्षक सौगात खड्काले रोके । प्रतियोगितामा आइतबार पहिलो खेल बेनी नगरपालिका म्याग्दी विरुद्ध पोखरा उपमहानगरपालिका तथा दोस्रो खेल चान्द्राडी नगरपालिका उदयपुर विरुद्ध जैमिनी नगरपालिका बागलुङबीच प्रतिस्पर्धा हुनेछ ।

बागलुङ नगरपालिकाको आयोजना र जिल्ला फुटबल संघ बागलुङको समन्वयमा संचालित प्रतियोगिताको विजेताले उपाधिसहित ३ लाख, दोस्रोले २ लाख र सेमिफाइनल पुग्ने टोलीले समान ६० हजार रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडीले दश हजार तथा उत्कृष्ट फरवार्ड, मिडफिल्डर, डिफेन्डर, गोलकिपर र उच्च गोलकर्ताले समान ५ हजार रुपैयाँ प्राप्त गर्नेछन् । प्रतियोगिताको फाइनल खेल २१ गते हुनेछ ।