अर्जुन कार्की, बागलुङ

बागलुङ बजारमा जारी दोस्रो मेयर कप राष्ट्रिय फुटबल प्रतियोगिताको सेमिफाइनल समिकरण पुरा भएको छ ।
आइतबार बेनी नगरपालिका म्याग्दी र चौदण्डीगढी नगरपालिका उदयपुरले जित हात पार्दै सेमिफाइनलमा प्रवेश गरेका छन् ।

बेनी नगरपालिकाले पोखरा महानगरपालिकालाई टाइब्रेकरमा ६–५ गोलअन्तर र चौदण्डीगढी नगरपालिकाले बागलुङको जैमिनी नगरपालिकालाई २–१ गोलअन्तरले पराजित गर्दै सेमिफाइनलमा प्रवेश गरेका हुन् ।

पहिलो खेलमा बेनी नगरपालिकाले सुरुवाती अग्रता लिएपनि जोगाउन नसक्दा जितको लागि टाइब्रेकरसम्म कुर्नुपरेको थियो । बेनीले खेलको २४ औं मिनेटमा निसान गुरुङको गोलबाट अग्रता लिएको थियो ।

पोखराका खेलाडीले खेलको ४६ औं मिनेटमा डिबक्स भित्र ह्यान्ड गरेपछि पाएको पेनाल्टीमा गोल गर्दै बेनीका सन्तोष पुनले गोलगर्दै २–० को अग्रता बनाएका थिए ।

२ गोल पछि परेको पोखराले निरन्तर आक्रमक खेल खेल्दै खेल्दा बेनीका ढानेन्द्र क्षेत्रीले ५० औं मिनेटमा आत्मघाती गोल गर्न पुगेका थिए । पोखराको लागि खेलको ६७ औं मिनेटमा गंगा गुरुङले गोल गर्दै खेललाई २–२ को बराबरीमा ल्याएका थिए ।

पेनाल्टीमा म्याग्दीका विश्वास थापा, सन्तोष पुन मगर, निशान गुरुङ, अजय रामजाली र ढानेन्द्र क्षेत्रीले गोल गरेका थिए । यस्तै सडनडेथमा रिमान मगरले गोल गरेका थिए ।
पोखराको लागि पेनाल्टीमा अञ्जन देवकोटा, बेलप्रसाद गुरुङ, अर्जुन राना मगर, हिरा गुरुङ र संगम डार्गिले गोल गरेका थिएभने सडन डेथमा रमेश थापा मगरको प्रहार म्याग्दीका गोलरक्षक निशान किसानले विफल पारिदिएका थिए ।

यस्तै आजै भएको अन्तिम क्वाटरफाइनल खेलमा सरद राईको २ गोलको मद्धतमा चौदण्डीगढी नगरपालिका उदयपुर सेमिफाइनलमा प्रवेश गरेको छ ।

समय अभावका कारण ६० मिनेटको खेलाइएको खेलको पहिलो हाफमा १ गोलले पछि परेको चौदण्डीगढी नगरपालिकाले दोस्रो हाफमा उत्कृष्ट पुनरागमन गर्दै जित हात पारेको हो ।

जैमिनीका लागि खेलको १९ औं मिनेटमा महेश लामाले गोलगर्दै टिमलाई अग्रता दिलाएका थिए । चौदण्डीगढीका खेलाडीहरुले अफसाइडको माग गरिरहेको अवस्थामा उनले वान भर्सेज वानको अवस्थामा गोल गरेका हुन् ।

चौदण्डीगढी नगरपालिकाको लागि सरदले खेलको ३६ औं मिनेटमा गोल गर्दै खेललाई बराबरीमा ल्याएका थिए । यस्तै ५१ औैं मिनेटमा जैमिनीका संजिव अर्यालले गोललाईनमा बललाई हातले बाहिर थकेलेपछि रेडकार्ड खाँदै बाहिरिएपछि पाएको पेनाल्टीमा सरदले नै गोल गर्दै खेललाई २–१ को अवस्थामा ल्याए ।

खेलमा दुवै टिममा अन्य समयमा गोल नभएपछि चौदण्डीगढी सेमिफाइनलमा प्रवेश ग¥यो । खेलको ५६ औं मिनेटमा जैमिनीका मनोज राईले दोहोरो पहेलो कार्ड सहित रेडकार्ड खाँदै बाहिरिए ।

प्रतियोगितामा सोमबार सेमिफाइनलका खेलहरु हुनेछन् । पहिलो सेमिफाइनल बागलुङ नगरपालिका विरुद्ध भीमाद नगरपालिका तनहुँ र दोस्रो सेमिफाइनल बेनी नगरपालिका म्याग्दी विरुद्ध चौदण्डीगढी नगरपालिका उदयपुर विच हुनेछ ।
बागलुङ नगरपालिकाको आयोजना र जिल्ला फुटबल संघ बागलुङको समन्वयमा संचालित प्रतियोगिताको विजेताले उपाधिसहित ३ लाख, दोस्रोले २ लाख र सेमिफाइनल पुग्ने समान ६० हजार रुपैयाँ प्राप्त गर्नेछन् ।

प्रतियोगिताको सर्वोत्कृष्ट खेलाडीले दश हजार तथा उत्कृष्ट फरवार्ड, मिडफिल्डर, डिफेन्डर, गोलकिपर र उच्च गोलकर्ताले समान ५ हजार रुपैयाँ प्राप्त गर्नेछन् ।
प्रतियोगिताको फाइनल खेल २१ गते हुनेछ ।