काठमाडौं (हाम्रो खेलकुद) – कतार एयरवेज सहिद स्मारक ए डिभिजन लिग अन्तर्गत सोमबार दोस्रो खेलमा साविक विजेता मनाङ मर्स्याङ्दी क्लबले सिजनको पहिलो हार बेहोरेको छ ।

एन्फा कम्प्लेक्समा भएको खेलमा च्यासल युवा क्लबले मनाङलाई २-० ले‌ पराजित गरेको हो । च्यासलको जितमा टाइगा नाकामुराले पहिलो हाफमा गरेको फ्रिकिक गोल र सन्तोष साहुखलको गोल समावेश थियो । सिजनको पहिलो हारसँगै मनाङले शीर्षस्थानमा रहेको आर्मीसँग अग्रता कम गर्ने अवसर गुमाएको छ ।

तेस्रो स्थानमा सिमित रहेको मनाङले लिगका १० खेलमा ५ जित, ४ बराबर र १ हारसहित १९ अंक जोडेको छ । यता च्यासल भने १० खेलमा १२ अंक जोड्दै नवौे स्थानमा उक्लिएको छ । यस जितले च्यासल रेलिगेसनबाट मुक्त भएको छ ।

च्यासलका लागि खेलको तेस्रो मिनेटमा बिक्रम लिम्बुको फ्रिकिकमा अमिर श्रेष्ठको प्रहार पाेस्टबाट थोरै आकासियाे । १३अौं मिनेटमा कमल श्रेष्ठको प्रहार पाेस्टबाट थोरैले बाहिरियो । २५अौं मिनेटमा टाइगा नाकनमुराले गोल गर्दै च्यासललाई अग्रता दिलाए । दयानन्द सिंहले लडाएको फलमा टाईगाले २५ यार्ड टाढाबाट फ्रिकिकमा सुन्दर गोल गर्न सफल भएका थिए ।

३६अौं मिनेटमा अन्जन बिष्टको प्रहार आकासियो । पहिलो हाफको अन्त्यतिर जोसुवा फेमीेले पेनाल्टी क्षेत्र बाहिरबाट सट प्रहार गर्न ढिलो गर्दा मनाङ खेलमा फर्कन सकेन ।

६५अौं मिनेटमा फेमीकै पेनाल्टी क्षेत्र बाहिरको प्रहार आकासियो । ६६अौं मिनेटमा बिमल रानाको क्लाेज रेन्जबाट गरेको प्रहारलाई छिरिङ गुरुङले ब्लक गरिदिए । ८१अौं मिनेटमा अन्जन बिष्टले गरेको प्रहार पाेलमा लाग्दै फर्कियो । त्यसै रिबाउन्डमा उनले फउल गर्न पुगेका थिए ।

८९अौं मिनेटमा च्यासलका प्रशिक्षक बाल गोपाल साहुखल रातो कार्ड खादै टच लाईनबाट बाहिरिन पुगे । इन्ज्युरी समयमा सन्तोष साहुखलले नाकामुराको पासमा गोल गर्दै च्यासलको जित पक्का गरे । च्यासलले जित दर्ता गर्दै लिगको उपाधि भिडन्तमा रोमाञ्च थपेको छ ।