काठमाडौं (हाम्रो खेलकुद)– शीर्ष दुईमा रहेका त्रिभुवन आर्मी क्लब र सानमिगेल मछिन्द्र क्लबबीच कतार एयरवेज सहिद स्मारक ए डिभिजन लिगको अन्तिम खेल हुने तय भएको छ । अखिल नेपाल फुटबल संघ (एन्फा) ले अन्तिम ३ चरणको खेलका लागि मंगलबार खेल तालिका सार्वजनिक गर्दा आर्मी र मछिन्द्रबीचको खेल फागुन ३ गते शनिबारका लागि तय गरिएको हो ।

१० चरणको खेलको समाप्तीमा आर्मी २३ अंकसहित शीर्षस्थानमा छ भने मछिन्द्र २२ अंकसहित दोस्रो स्थानमा छन् । लिगको दसौं चरणको खेल माघ २३ बाट सुरु हुनेछ । मछिन्द्रको सामना गर्नुअघि आर्मीले माघ २३ गते नेपाल एपिएफ क्लब माघ २७ गते ब्रिगेड ब्वाइज क्लबसँग प्रतिस्पर्धा गर्नेछ ।

त्यस्तै मछिन्द्रले आर्मीसँग भिड्नुअघि माघ २३ गते सरस्वती युवा क्लब र माघ २७ गते संकटा क्लबको सामना गर्नेछ । आर्मी र मछिन्द्रको खेल फागुन ३ गते त्रिपुरेश्वरस्थित दशरथ रंगशालामा हुनेछ ।

त्यसबाहेकका २० खेल सातदोबाटोस्थित एन्फा कम्प्लेक्सको मैदान र हलचोकस्थित एपिएफको मैदानमा हुनेछ । एन्फाको खेल तालिका अनुसार १४ खेल एन्फा र ६ खेल हलचोकमा हुनेछन् । लिगको रोमाञ्चकतालाई अन्तिम सम्म कायम राख्नका लागि एन्फाले मछिन्द्र र आर्मीको खेल अन्तिममा पारेको हो ।

‘लिग अहिले रोचक मोडमा पुगेको छ । यसको रोमाञ्चकता अन्तिम सम्म पनि रहोस् भन्नका लागि हामीले यसअघि तय भएको १२ औं र १३ औं चरणको खेल हल्का फेरबदल गरेका छौं, लिगका निर्देशक सञ्जिव मिश्रले भने,‘ १२ औं चरणको खेललाई १३ औं र १३ औं कोलाई १२ चरणमा आयोजना गर्ने गरि तय गर्यौं । आशा छ यसले लिग अन्तिम खेल सम्म पनि रोचक हुन सक्छ ।’

नेपाल आयल निगम मनाङ मस्र्याङ्दी क्लब १९ अंकसहित तेस्रो स्थानमा, १७ अंकसहित रुस्लान थ्री स्टार क्लब चौथो स्थानमा रहेको छ । ४ अंक जोडेको सरस्वती अंक तालिकाको पुछारमा रहेको छ । पुछारमा रहने टोली रेलिगेसनमा पर्नेछ ।

 

लिगको अन्तिम ३ चरणको खेल तालिका