काठमाडौं (हाम्रो खेलकुद)– सर्वोच्च अदालतले रौतहटमा निर्माणाधिन एकेडेमी यथास्थितिमा राख्नु भन्दै अखिल नेपाल फुटबल संघ (एन्फा) का नाममा अन्तरिम आदेश जारी गरेको छ ।

अधिवक्ता सुजित केसीले दायर गरेको रिटमा सर्वोच्चका न्यायाशिक परुषोत्तम भण्डारीको एकल इजलासले बुधबार छलफलको दिन सम्मका लागि निर्णयहरु कार्यान्वयन नगर्नु र यथास्थितिमा राख्नु भन्दै अन्तरिमक आदेश जारी गरेको हो ।

रौतहटमा गैरकानुनी रुपमा एन्फा एकेडेमी निर्माण भइरहेको भन्दै केसीले एन्फासहित विभिन्न सरकारी निकायलाई विपक्षी बनाएर रिट दायर गरेका थिए । सर्वोच्चले दुवै पक्षलाई छलफल गराई निष्कर्षमा पुग्ने भन्दै माघ २९ गतेका लागि छलफलका लागि डाकेको छ ।

एन्फाले रौतहट जिल्लास्थित चन्द्रपुर नगरपालिका ६ मा सरकारी जग्गामा गैरकानुनी रुपमा कब्जा गरि महिला फुटबल एकेडेमी निर्माण गरेको भन्दै केसीले सर्वोच्च अदालतमा मंगलबार रिट दायर गरेका थिए ।

हातेमालो सामुदायिक वन उपभोक्ता समितिको क्षेत्राधिकार भित्र रहेको ३.५ हेक्टर जग्गामा कृक्रिम मिनी पिच निर्माण गर्न उपभोक्ता समितिसँग सम्झौत गरेपनि एन्फाले महिला एकेडेमीका लागि दुई तले भवन निर्माण गरिसकेको छ ।

सरकारी स्वामित्वको जग्गा अनधिकृत रुपमा कब्जा गरी निर्माण कार्य गरेको भन्दै अधिवक्ता केसीले एन्फा, वन तथा वातावरण मन्त्रालय, युवा तथा खेलकुद मन्त्रालय, राष्ट्रिय खेलकुद परिषद्, जिल्ला बन कार्यलय रौतहट, रौतहट जिल्ला फुटबल संघ, हातेमालो सामुदायिक वन उपभोक्ता समितिलगायतलाई विपक्षी बनाई रिट दायर गरेका थिए ।