काठमाडौं (हाम्रो खेलकुद)– झन्डै छ वर्ष लामो खेल जीवनमा राष्ट्रिय टोली एवंम एपिएफका दुई स्टार एकअर्का विरुद्ध खेल्ने तयारीमा छन् । फरवार्ड सावित्रा भण्डारी सम्बा र मिडफिल्डर अनिता बस्नेत भारतीय महिला लिग (आईडब्लुएल)को सेमिफाइनलमा सोमबार एकअर्काविरुद्ध भिड्दैछन् । सावित्रा र अनिता पहिलो पटक अलग टोलीबाट यो सिजन खेलिरहेका छन् ।

‘पहिलो पटक एकअर्काविरुद्ध खेल्न लाग्दा अलिक कस्तो त लाग्ने रहेछ,’ सावित्राले भनिन्, ‘तर व्यवासायिक जीवनमा यो स्वभाविक हो । दुवै टोली राम्रो खेलिरहेका छन्, त्यसैले सहज हुने छैन ।’ अनिता सम्मलित सावित्र विजेता सेथु एफसी र सावित्रा रहेको गोकुलम केरला एफसीबीच आई लिगको सेमिफाइनल हुँदैछ ।

सेथु समूह ‘ए’को उपविजेता र गोकुलम समूह ‘बी’को विजेताका रुपमा अन्तिम दुईमा पुगेका हुन् । समूहको राउन्ड रोविनमा सावित्राको टोली अपराजित छ भने अनिताको टोलीले एक खेलमा हार बेहोरेको थियो ।

सावित्राले खेलेका सबै ५ खेलमा १३ गोल गरेकी छिन् । दुई खेलमा समान ५ गोल गरेकी सावित्राले ३ खेलमा समान १ गोल गरेकी थिइन् । सबै खेलको पहिलो रोजाईमा नपरेकी अनिताले भने गोलको खाता खोल्न बाँकी छ ।

सावित्राविरुद्ध खेल्नु परेकोले अलिक फरक अनुभव भने भइरहेको अनिताले सुनाइन् । ‘पहिलो पटक एकअर्काविरुद्ध खेल्दैछौं । त्यसैले अलिक कस्तो कस्तो लागेको छ,’ उनले भनिन्, ‘तर जुन क्लबबाट खलिन्छ त्यसलाई जिताउन हर सम्भव प्रयास गर्नेछु ।’

जारी लिगमा उच्च प्रदर्शन गरिरहेका सावित्रा खेल्ने पक्का छ । अनिताले समूह चरणमा एउटा बाहेक सबै खेलमा पहिलो रोजाईमा सुरुवात गरेकी थिइन् । सोमबार पनि उनी पहिलो रोजाईबाट खेल्ने लगभग पक्का छ ।

सन् २०१४ देखि राष्ट्रिय टोलीमा सँगै खेलिरहेका सावित्रा र अनिता एपिएफमा भने केहि सयमको फरकमा आबद्ध भएका थिए । सावित्रा २०७१ र अनिता त्यो भन्दा केहि महिना अघि एपिएफमा आबद्ध भएकी थिइन् । पाकिस्तानमा भएको साफ च्याम्पियनसिपमा यी दुई जना पहिलो पटक राष्ट्रिय टोलीमा परेका थिए । त्यसयता दुवै राष्ट्रिय टोलीका नियमित सदस्य रहँदै आएका छन् ।

गत वर्ष सेथुमा सँगै आइलिग खेलेका सावित्रा र अनिताले त्यसअघि दुई सिजन माल्दिभ्समा एउटै क्लबबाट फुटसल खेलेका थिए । घरेलु मैदानमा एपिएफ र राष्ट्रिय टोलीबाट अधिकांश खेलमा नियमित खेल्दै आएका छन् । सावित्राले भने फरक क्लबबाट खेल्दा पनि अनितालाई मिस हुने बताइन् ।

‘राष्ट्रिय टोली र एपिएफबाट हामी खेल्दा अनिता दिदीको पासमा मैले धेरै गोल गरेको छु । हामी एक अर्काले बल प्राप्त गर्दा कहाँ निस्कने भन्ने बुझिहाल्छौं,’ सावित्राले भनिन्, ‘त्यसैले अर्को क्लबबाट खेल्दा पनि दिदीलाई मिस गर्छु । तर अब सधै आफुले चाहे जस्तो हुन्न । हामी दुवै आ आफ्नो टोलीलाई जिताउन लाग्नेछौं । दुवै टोली बलियो नै छ । ‘