काठमाडौं – हिमालयन बाँसबरी क्लबले राजधानीमा जारी सहिद स्मारक ‘बी’ डिभिजन लिगमा लगातार दोस्रो जित निकालेको छ । बाँसबारले ब्वाइज युनियन क्लबलाई ३–२ ले पराजित गर्दै लिगमा लगातार दोस्रो जित निकालेको हो । सातदोबाटोस्थित एन्फा कम्प्लेक्सको खेल मैदानमा बुधबार भएको खेलमा बाँसबारीले दुई गोलले पछि परेको स्थिति उल्ट्याएर जित हात पारेको हो ।

बाँसबारीको जितमा सुलेमान थापा, सुरेश कुमाल र सजिन थापामगरले गोल गरे । ब्वाइज युनियनका कप्तान टंक बहादुर स्याङ्तान र अरुण लिम्बुले गोल गरे । खेलको २३औं मिनेटमा टंकको गोलबाट ब्वाइज युनियले खेलमा अग्रता बनाएको थियो । ६०औं मिनेटमा अणको गोलबाट ब्वाइज युनियनले खेलमा २–० को अग्रता लिन सफल भयो ।

२–० ले पछि परेपछि आक्रमक खेल पस्केको बाँसबारीका सुलेमनको ७९औं मिनेटमा गोल गर्दै खेलमा फर्काउने संकेत दिए । इन्ज्युरी समयको थप गरिएको पहिलो मिनेटमा सुरेशले गोल गर्दै खेललाई २–२ गोलको बराबरीमा ल्याए । इन्ज्युरी समयको थप गरिएको पाँचौ मिनेटमा सजिन थापामगरले गोल गर्दै बाँसबारीलाई ३–२ को रोमाञ्चक जित दिलाए ।

बुधबारकै अर्काे खेलमा श्री कुमारी क्लबले पुल्चोक स्पोर्ट्स क्लबमाथि ३–२ को जित निकालेको छ । श्री कुमारीको जितमा कप्तान रुकेश श्रेष्ठ र मिसन लामाले गोल गरे । एक गोल उपहार पाएको थियो । पुल्चोकको दुवै गोल सेरव तामाङले गरे । प्रतिस्पर्धात्मक खेलको पहिलो हाफ गोलरहित बराबरीमा सकिएको थियो ।

४७औं मिनेटमा पुल्चोकका याम बहादुर श्रेष्ठको आत्मघाती गोलबाट श्री कुमारीले ेलमा अग्रता बनाएको थियो । ६५औं मिनेटमा सेरवले बराबरी गोल फर्काए । ७९औं मिनेटमा रुकेशले गोल गर्दै श्री कुमारीलाई पुनः २–१ को अग्रता दिलाए । ८३औं मिनेटमा मसन लामाले गोल गर्दै श्री कुमारीलाई खेलमा ३–१ ले अघि बढाए ।

इन्ज्युरी समयको थप गरिएको चौथो मिनेटमा सेरवले व्यक्तिगत दोस्रो गोल गरेपनि हार टार्न नसक्दा पुल्चोक ३–२ ले पराजित हुन पुग्यो । लिगमा बिहीबार दुई खेल हुनेछ । पहिलो खेलमा श्री भगवती र मध्यपुर तथा दोस्रो खेलमा टुसाल र सातदोबाटोबीच प्रतिस्पर्धा हुनेछ ।