एजेन्सी – स्टार फरवार्ड क्रिस्टियानो रोनाल्डोले स्पेनिस क्लब रियल म्याड्रिड छाडेपछि बार्सिलोनाका कप्तान लिओनेल मेस्सीको एल क्लासिको प्रदर्शन नाटकीय ढंगले कमजोर भएको छ ।

रोनाल्डोले स्पेन छाडेयता रियल र बार्सिलोनाबीच ५ खेल भएको छ । मेस्सीले ति सबै खेलमा न त कुनै गोल गरेका छन् न कुनै असिस्ट नै दिएका छन् । आइतबार मात्र लिगको दोस्रो एल क्लासिकोमा रियल २-० ले विजयी रहँदा मेस्सीको प्रदर्शन अपेक्षित रहेन । उक्त हारले बार्सिलोना अंक तालिकाको शीर्षस्थान रियललाई सुम्पंदै एक अंक पछाडी दोस्रो स्थानमा पुग्यो ।

मेस्सीले रोनाल्डो म्याड्रिडबाट खेल्दा एल क्लासिकोका ३३ खेलमा २१ गोल गरेका थिए । तुलनात्मक रुपमा मेस्सीको प्रदर्शन रोनाल्डोको प्रस्थानसँगै घट्दै गएको छ । मेस्सीले अझ रोनाल्डो हुँदाका पछिल्लो केहि वर्ष उत्कृष्ट प्रदर्शन गर्दै आएका थिए । उनले सन् २०१६-१७ सिजनमा खेलको ९२ औं मिनेटमा गोल गर्दै रियलको मैदानमा नै ३-२ को जित दिलाएका थिए ।

सन् २०१७ को स्पेनिस सुपर कपमा मेस्सीले पहिलो लेगमा गोल गरेपनि रियल ३-१ ले विजयी रहयो । तर दोस्रो लेगमा रोनाल्डो निलम्बनमा पर्दा मेस्सीले गोल गर्न भने सकेनन् । त्यसपछि सन् २०१७-१८ सिजनमा मेस्सीले दुवै खेलमा गोल गरेका थिए । बर्नाबाउमा बार्सिलोना ३-० ले विजयी रहँदा क्याम्प नोउमा भने खेल २-२ को बराबरीमा सकियो ।

गत सिजन मेस्सीले लिगको पहिलो क्लासिको चोटका कारण खेल्न सकेनन् । त्यसपछि कोपा डेल रे सेमिफाइनलको दुवै लेगमा उनले गोल गर्न सकेनन् । ला लिगाको दोस्रो क्लासिकोमा पनि राकीटिचको गोल मात्र जितका लागि पर्याप्त रहयो ।

यस सिजन मेस्सीले लिगका दुवै क्लासिकोमा कोर्टुवालाई बिट गर्न सकेनन् । अझैपनि यस सिजन यी दुई टोलीको च्याम्पियन्स लिगमा भिडन्त हुने सम्भावना छ । त्यसबेला मेस्सीले रियलविरुद्ध गोल गर्ने अवसर भने प्राप्त गर्नेछन् ।