काठमाडौं (हाम्रो खेलकुद) – खुमलटार युथ क्लब सहिद स्मारक ‘बी’ डिभिजन  लिगको शीर्षस्थानमा उक्लिएको छ । लिगको तेस्रो चरणको खेल सकिदा अपराजित रहेको खुमलटारले शतप्रतिशत जित निकाल्दै शीर्षस्थानमा उक्लन सफल भएको हो ।

समान खेलबाटै सातदोबाटो युथ क्लबको ९ अंक नै रहेपनि खुमलटार गोल अन्तरमा अघि बढेको हो । खुमलटारले लिगमा ६ गोल गर्दा १ गोल मात्रै खाएको छ । सातदोबाटोले ४ गोल गर्दै कुनै गोल खाएको छैन । अपराजित नै रहेको बाँसबारीको ३ खेलबाट ८ अंक रहेको छ । अघिल्लो वर्ष रेलिगेसन जोनमा रहेका कारण बाँसबारीको १ अंक घटाइएको हो ।

तेस्रो चरणको खेल सकिदा पुल्चोक स्पोर्टस् क्लब र मध्यपुर युथ एसोसिएसनले अंक जोड्न सकेका छैनन् । लिगमा बढी अंक जोड्ने एक टोली शीर्ष डिभिजनमा बढुवा हुनेछ । एक टोली घटुवा हुनेछ ।

शुक्रबार सातदोबाटोस्थित एन्फा कम्प्लेक्सको खेल मैदानमा भएको खेलमा खुमलटारले नयाँ बस्ती युवा क्लबमाथि २–१ को जित निकाल्न सफल भएको छ । खुमलटारको जितमा आदिल हामिद र सविन केसीले गोल गरे । नयाँ बस्तीका गणेश हमालले सान्त्वना गोल फर्काए ।

खेलको ३१औं मिनेटमा आदिल हामिदले गोल गर्दै खुमलटारलाई अग्रता दिलाए । ५०औं मिनेटमा खुमलटारका सविन केसीले विवादास्पद पेनाल्टीमा गोल गर्दै अग्रता दोब्बर पारे । पेनाल्टी बक्समा लडाएको भन्दै रेफ्रीले खुमलटारलाई पेनाल्टीको मौका दिएको थियो । त्यसमा सविनले गोल गर्न सफल भएका थिए ।

त्यसपछि नयाँ बस्तीले पेनाल्टी नरहेको भन्दै अवरोध गर्दा खेल झन्डै ५ मिनेट अवरुद्ध भएको थियो । ७५औं मिनेटमा खुमलटार १० खेलाडीमा समेटिएको थियो । इन्ज्युरी समयमा नयाँ बस्तीका गणेश हमालले गोल गरेपनि नयाँ बस्तीले हार टार्न सकेन ।