काठमाडौं (हाम्रो खेलकुद) – सातदोबाटो युथ क्लब सहिद स्मारक ‘बी’ डिभिजन लिग फुटबलको शीर्षस्थानमा उक्लिएको छ ।सातदोबाटोले मंगलबार पुल्चोक स्पोर्ट्स क्लबलाई १–० ले पराजित गर्दै लिगको शीर्षस्थानमा उक्लिएको हो । 

बराबरीतर्फ धकेलिएको खेलको इन्ज्युरी समयमा भुवन बस्नेतले गोल गर्दै सातबाटोलाई महत्वुपर्ण जित दिलाए ।  जितसँगै अपराजित रहेको सातदोबाटोले ४ खेलमा १२ अंक जोडेको छ । पुल्चोकले भने अंक जोड्न सकेको छैन ।

यता, यसपटक शीर्ष डिभिजनमा बढुवा हुने अपेक्षा गरिएको रानी पोखरी कर्नर टिम (आरसिटी) ले कमजोर प्रदर्शनलाई निरन्तरता दिदा मंगलबार बाँसबारी क्लबसँग हार बेहोरेको छ । सातदोबाटोस्थित एन्फा कम्प्लेक्समा भएको लिगको चौथो चरणको खेलमा आरसिटीले बाँसबारीसँग २–१ को हार बेहोरेको हो ।

लगातारको हारसँगै आरसिटी शीर्ष डिभिजनमा उक्लने सम्भावना न्युन बन्दा रेलिगेसनको खतरा बढेको छ । अघिल्लो वर्ष रेलिगेसनविनाको लिगमा च्याम्पियन बनेको आरसिटीले यो सिजन चार खेल खेल्दा २ अंक मात्रै जोडेको छ । अघिल्लो वर्ष पुछारमा रहेका कारण १ अंक घटाइएको बाँसबारी ११ अंक जोडेर दोस्रो स्थानमा उक्लिएको छ ।

बाँसबारीको जितमा अमृत गुरुङ र सजिन थापामगरले गोल गरे । आरसिटीका लागि शिसस थापाले गरेको गोल सान्त्वना बन्यो । आरसिटीले खेलमा लिएको शुरुवाती अग्रता जोगाउन नसक्दा पराजित हुन पुगेको हो । खेलको २४औं मिनेटमा शिससको गोलबाट आरसिटीले खेलमा अग्रता बनाएको थियो । ५१औं मिनेटमा अमृत गुरुङले बराबरी गोल फर्काए ।

७६औं मिनेटमा सजिन थापामगरले गोल गर्दै बाँसबरीको जित पक्का गरे । खेलको इन्ज्युरी समयमा सुरेश कुमालले दुई पहेलो कार्डसहित रातो कार्ड पाएपछि बाँसबारी १० खेलाडीमा समेटिएको थियो ।