एजेन्सी – स्विडिस फरवार्ड ज्लाटान इब्राहिमोभिच सन्यास लिने सोचमा रहेका छन् । ३८ वर्षे स्ट्राइकर जनवरीमा एलए ग्यालेक्सीबाट एसी मिलान पुगेका थिए । कोराना भाइरस कोभिड-१९ को असर विश्वव्यापी रुपमा बढेपछि अहिले उनी आफ्नो देश स्वीडेनमा छन् ।

स्वदेश फर्केसँगै आफ्नो भविष्यका विषयमा पनि उनले सोचिरहेका छन् । कोराना भाइरसको कारण पारिश्रमिक नदिने मिलानको योजनामा उनी सहमत नरहेको बताइएको छ । इटालियन सञ्चारमाध्यमका अनुसार इब्राहिमोभिच मिलानमा थप बस्ने योजनामा छैनन् । मिलानमा उनले सुखद सुरुवात गरेपनि क्लब व्यवस्थापनसँग लामो समयदेखि असमझदारी रहँदै आएको छ ।

करीअरको उत्तरार्द्धमा पुगेका ज्लाटनले सन्यास नलिएको खण्डमा सिरि सी क्लब मोन्जा जान सक्ने अनुमान समेत गरिएको छ । यदि मोन्जा बीमा बढुवा भएको खण्डमा क्लबका मालिकहरु सिल्भियो ब्रेलुसकोनी र एड्रियानो गालिनीले उनीसँग छलफल गर्ने सम्भावना छ । तर कोरोनाका कारण सिजन रद्द हुने सम्भावना बढेसँगै उनको भविष्यमा पनि शंका बढेको छ ।

मोन्जाका प्रशिक्षक क्रिस्टियन ब्रोचीले पनि इब्राहिमोभिच आउने सम्भावनाको संकेत दिएका छन् । उनले भनेका छन्, ‘इब्राहिमोभिचसँग सम्झौता हुन सक्दैनन् भन्ने लागेको छ भने हाम्रो क्लबका समर्थकहरुले गल्ति गरेको पनि हुन सक्दछ ।’