काठमाडौं (हाम्रो खेलकुद) – नेपाली महिला राष्ट्रिय फुटबल टिम फिफा वरीयतामा २ स्थान तल झरेको छ । विश्व फुटबलको सर्वाेच्च निकाय (फिफा)ले शुक्रबार सार्वजसनक गरेको वरीयतामा नेपाल दुई स्थान तल झर्दै ९९औं स्थानमा पुगेको छ ।

यसअघि नेपाल ९७औं स्थानमा रहेको थियो । नेपालको कुल १२ सय अंक छ । नेपाली महिला फुटबल टिमले पछिल्लो पटक कुनैपनि अन्तराष्ट्रिे खेल खेलेको छैन । विश्व वरीयतामा २००९ मा नेपाली महिला टिमले ९२औं स्थानमा रहेको जुन हालसम्मकै उच्च वरीयता हो ।

दक्षिण एसियामा भने नेपाल दोस्रो स्थानमा रहेको छ । भारत ५५औं स्थानसहित दक्षिण एसियामा शीर्ष स्थानमा रहँदा  एसियाको ११औं स्थानमा छ । बंगलादेश १ सय ३४औं स्थानसहित दक्षिण एसियामा तेस्रो, श्रीलंका १ सय ४०, माल्दिभ्स १ सय ४२ र भुटान १सय ५४औं स्थानसहित छैटौ स्थानमा छ ।

विश्वमा सातौ वरीयतामा रहेको अष्ट्रेलिया एसियामा शीर्षस्थानमा छ । उत्तर कोरिया, जापान, चीन र दक्षिण अमेरिका एसियाको शीर्ष चारमा छन् । विश्वमा अमेरिका शीर्षस्थानमा यथावत रहँदा जर्मनी पनि दोस्रो स्थानमा यथावत छ ।

फ्रान्स, नेदरल्यान्ड, स्वीडेन, इंग्ल्यान्ड अष्ट्रेलिया, ब्राजिल, क्यानडा र उत्तर कोरिया शीर्ष १० मा रहँदा जापान ११औं स्थानमा छ । फिफाले अब अर्काे वरीयता जुनमा सार्वजनिक गर्नेछ ।