एजेन्सी – इटालीमा आयोजना भएको सन् १९९० को विश्वकप फाइनलमा जर्मनीले अर्जेन्टिनालाई पराजित गर्दै उपाधि जितेको थियो । उक्त खेलका रेफ्री एडगार्डो कोडसालले अर्जेन्टिनाका कप्तान डिएगो म्याराडोना सबैभन्दा खराब मानिस भएको बताएका छन् ।

फाइनलमा अर्जेन्टिना पराजित भएपनि खराब व्यवहारका कारण म्याराडोनाको खुब चर्चा भएको थियो । रेफ्री कोडसालले आजसम्म पनि उनको व्यवहार भुल्न नसकेको बताए । उक्त खेलमा रेफ्री कोडसालले अर्जेन्टिनाका पेड्रो मन्जनलाई रातो कार्ड देखाएका थिए ।

‘मैले म्याराडोनालाई पनि त्यसबेला रातो कार्ड दिन सक्थें । उनले कहिल्यै पनि अनुशासन बुझेनन्,’ उनले भने, ‘ मैले जब मन्जनलाई रातो कार्ड देखाएँ, उनले कराउँदै मकहाँ आए र फिफाले भ्रष्टाचार गरेको बताए । मैले उनलाई त्यसबेला बाहिर पठाउन सक्थें ।’

कोडसालले उक्त खेल सुरु हुनुअघि नै म्याराडोनालाई रातो कार्ड दिन सक्ने अवस्था रहेको बताए । ‘ यदि मैले चाहेको भए उनलाई उक्त खेल सुरु हुनुअघि नै बाहिर पठाउन सक्थें । उनले त्यसबेला मैदानमा उपस्थित दर्शकलाई दुर्व्यवहार गरेका थिए,’ म्याराडोनाले अपशब्द बोल्दै दर्शकहरुलाई माझि औंला देखाएको क्षणलाई इंगित गर्दै उनले भने ।

‘मैले उनलाई सम्झाएर उनी एक खेलाडी भएको बताएँ । उनी विश्वकै उत्कृष्ट खेलाडी थिए तर उनले यो कहिले पनि बुझेनन्,’ कोडसालले थपे । उनले म्याराडोनाको व्यवहार खराब भएपनि खेल्ने क्षमतामा भने उनि अद्भुत रहेको बताए । ‘ खेलाडीको रुपमा उनले सधैं मिहिनेत गरे । मेरो सधैं सम्मान रहनेछ,’ उनले भने ।