एजेन्सी – अर्जेन्टिना तथा इटालियन क्लब युभेन्टसका स्टार फरवार्ड पाउलो डिबालाले फुटबल धेरै ‘मिस’ गरिरहेको बताएका छन् । कोभिड–१९ का कारण खेलाडीहरुले गएको मार्च दोस्रो साता यता खेल्न पाएका छैनन् । 

यो महामारीको बीचमा नै डिबालाले फुटबल धेरै ‘मिस’ गरिरहेको बताएका हुन् । इटली सरकारले खेलाडीहरूलाई सोमबारदेखि प्रशिक्षणमा फर्कन अनुमति दिएपछि क्लबहरु प्रशिक्षणमा फर्किरहेका छन् । इटालीमा सिजनका बाँकी खेल पुनः सुरु गर्ने तयारी गरिरहेको छ ।

उनको टोली युभेन्टसले पनि प्रशिक्षण शुरु गरिसकेको छ । तर, उनी भने आइसोलेसनमै रहेको छ । पछिल्लो ६ हप्तामा चौथोपटक कोरोना पोजेटिभ देखिएपछि अहिले आराम गरिरहेका छन् । उनले आफूलाई स्वस्थ राख्न आरामको आवश्यकता भएको बताएका छन् । उनी पनि कोरोना संक्रमण हुने खेलाडी हुन् । डिबालासँगै युभेन्टसका ड्यानियल रुगानी र ब्लेइस माटुइडीलाई कोरोना संक्रमण देखिएको थियो । दुई खेलाडी भने निको भइसकेका छन् ।

‘तपाईंलाई साँचो कुरा भन्छु । मैले सोचेको थिइन कि यो समय मैले खेल्न र अभ्यास छोड्ने छु भनेर,’ डिबालाले भने, ‘मलाई लाग्छ मैले अभ्यास गर्नुपर्छ । मेरो टोलीका साथीहरूलाई हेर्नुहोस् । उनीहरूले कम्तीमा बल छुन पाएका छन् । तर, मैले मेरै घरमा अभ्यास गर्न पाएको छैन ।’

‘अभ्यास नगरेको धेरै लामो समय भयो । मलाई थाहा छैन, म प्रशिक्षणमा कहिले फर्किन्छु । किनकि यो छुट्टी जस्तो होइन,’ उनले थपे । डिबालाले युभेन्टसका लागि यो सिजन ३४ खेलमा १३ गोल गरेका छन् । डिबाला २०१५ देखि युभेन्टसमा रहेका छन् । उनले युभेन्टसबाट ४ पटक सिरी ‘ए’, तीनपटक कोपा इटालिया र दुईपटक सुपरकोपा इटालिया जितेका छन् ।