एजेन्सी – फ्रेन्च लिग वान च्याम्पियन पेरिस सेन्ट जर्मेन (पीएसजी) ले अर्जेन्टिना तथा इटालियन क्लब इन्टर मिलानका फरवार्ड मोउरो इकार्डीलाई औपचारिक रुपमा अनुबन्ध गरेको छ । 

यसै सिजन इन्टर मिलानबाट लोनमा पीएसजी पुगेका २७ वर्षे फरवार्डलाई पीएसजलिे ५२ मिलियन पाउण्डमा ४ वर्षको लागि अनुबन्ध गरेको हो । अब इकार्डी २०२४ सम्म पीएसजीमा रहनेछन् । कोरोनापछिको यो पहिलो र ठुलो सम्झौता हो ।

लोनमा रहँदै उच्च प्रदर्शन गरेपछि पीएसजीले इकार्डीलाई स्थायी रुपमा अनुबन्ध गर्न कसरत गरेको थियो । पीएसजीले इकार्डीलाई स्थायी रुपमा क्लबमै राख्न पाउँदा खुसी लागेको उल्लेख गरेको छ ।

पीएसजीमा इकार्डीको सम्झौता आइतबारसम्म नै रहेको थियो । शनिबार मात्रै पीएसजी र इन्टर मिलानले इकार्डीलाई पेरिसमै स्थायी सम्झौता दिने बिषयमा सहमति जुटाएका थिए ।

इन्टर मिलानले आफ्नो आधिकारिक वेवसाइटमा ४७ शब्दमा आफ्नो फरवार्ड इकार्डी पीएसजीमा अनुबन्ध भएको उल्लेख गरेको छ । यस्तै क्लबले ६ सिजन क्लबमा बिताएका इकार्डीलाई भावी व्यावसायिक करियरको शुभकामना दिएका छन् । पछिल्लो समय इन्टर र इकार्डीबिच सम्बन्ध चिसिएको थियो ।

इकार्डी २०१३ मा इटालियन क्लब साम्पडोरियाबाट इन्टर मिलान पुगेका थिए । उनले इन्टर मिलानमा २१९ खेलमा १२४ गोल गर्नुका साथै २८ असिस्ट दिएका छन् । अर्जेन्टिनी फरवार्ड इकार्डी इन्टर मिलानको मुख्य प्रशिक्षकमा एन्टोनियो कोन्टे आएपछि क्लबबाट बाहिरिएका थिए ।

विश्व फुटबलका स्टार नेयमार र केलियन एमबाप्पे रहेको पीएसजीबाट २७ वर्षीय इकार्डीले यस सिजन सबै प्रतियोगितामा ३१ खेलमा २० गोल गर्नुका साथै ४ असिस्ट दिएका छन् । अब इकार्डीको स्थायी सम्झौतासँगै नेयमार, एमबाप्पे र काभानीमध्य एकले क्लब छाड्ने पक्कापक्की देखिएको छ ।