एजेन्सी – स्पेनिस क्लब रियल म्याड्रिडले इंग्लिस मिडफिल्डर हार्भी एलिएटलाई क्लबका कप्तान सर्जियो रामोसलाई भेट्ने प्रस्ताव गर्दा उनले अस्विकार गरेको खुलासा भएको छ ।

गत वर्ष रियलले त्यसबेला १६ वर्ष मात्र पुगेका इंग्लिस मिडफिल्डरलाई दोस्रो श्रेणीको क्लब फुलहमबाट अनुबन्धन गर्ने प्रयास गरेको थियो । रियलले अनुबन्धनबारे औपचारिक छलफल तथा एलिएटलाई क्लबबारे थप जानकारी दिन सान्टियागो बर्नाबाउ नै लागेको थियो । बर्नाबाउ घुम्ने क्रममा रामोसको जर्सीअगाडी पुगेपछि क्लबले उनलाई रामोसलाई भेट्न प्रस्ताव राखेको थियो । तर एलिएटले उक्त प्रस्ताव नकारिदिए ।

रियलको प्रस्तावमा एलिएटको जवाफ थियो, ‘पर्दैन । प्रस्तावको लागि धन्यवाद । तर उनले सलाहलाई जे गरे, त्यसपछि मलाई उनी मन पर्दैन ।’

सन् २०१७-१८ को च्याम्पियन्स लिग फाइनलमा रियलका कप्तान सर्जियो रामोसले खेलको सुरुवाती समयमा नै लिभरपुल फरवार्ड मोहमद सलाहमाथि फल गरेका थिए । त्यसक्रममा घाइते भएका सलाहले उक्त फाइनल त गुमाए नै, कुमको चोटका कारण लामो समय मैदानबाहिर बस्नुपरेको थियो ।

त्यहाँबाट इंग्ल्यान्ड फर्केका एलिएटले पछि रियल म्याड्रिडलाई समेत नकार्दै आफूले बाल्यकालदेखि समर्थन गरेको क्लब लिभरपुलमा अनुबन्धन गरे । एलिएटले आफैं सलाहलाई आदर्श खेलाडी मान्दै आएको समेत एक अन्तर्वार्तामा बताएका छन् । मात्र १७ वर्ष भएपनि हाल उनी लिभरपुलको सिनियर टोलीमा सलाह लगायत अन्य खेलाडीसँग नै प्रशिक्षण गर्दै आएका छन् ।