एजेन्सी – बोरुसिया मोन्चेनग्लाडवाच जर्मन बुन्डेस लिगाको तेस्रो स्थानमा उक्लिएको छ । आइतबार राति भएको खेलमा युनियन बर्लिनमाथि ४–१ को सहज जित निकाल्दै मोन्चेनग्लाडवाच तेस्रो स्थानमा उक्लन सफल भएको हो ।

मोन्चेनग्लाडवाचले बायर लिभरकुसनलाई गोल अन्तरमा पछि पारेको हो । दुवै टोलीको समान खेलबाट समान ५६ अंक छ । पराजित युनियन बर्लिन ३१ अंक जोडेर १४औं स्थानमा छ । बोरुसिया पार्कमा घरेलु टोलीको जितमा मार्कुस थुरामले दुई तथा फ्लोरियन नोइह्यास र एलासेन फ्लिले समान एक गोल गरे । बर्लिनका सेवास्टिन एन्डरसनले सान्त्वना गोल गरे ।

खेलको १७औं मिनेटमा फ्लोरियनको गोलबाट घरेलु टोलीले खेलमा अग्रता बनाएको थियो । ४१औं मिनेटमा थुरामले गोल गरेपछि मोन्चेनग्लाडवाचले पहिलो हाफमा २–० को अग्रता बनाउन सफल भएको थियो ।  ५०औं मिनेटमा बर्लिनका सेवास्टिनले गोल गर्दै खेललाई २–१ को अवस्थामा ल्याउदै खेलमा फर्कने संकेत दिएका थिए ।

तर, ५९औं मिनेटमा थुरामले व्यक्तिगत दोस्रो गोल गरेपछि मोन्चेनग्लाडवाचले खेलमा ३–१ को अग्रता बनायो । बर्लिनविरुद्धको दोस्रो गोल गरेपछि थुरामले घुँडा टेकेर शिर निहुराउदै अमेरिकामा जातिय हिंसामा परि मृत्यु भएका जर्ज फ्लोएडप्रति समर्पित गरेका थिए । फ्लोएडको मृत्युपछि अमेरिकी सडकमा ठुलो विरोध प्रदर्शन भइरहेको छ ।

डेरेक चौविन (वर्दी) लाई फ्लोएडको हत्याराको आरोप लगाइएको छ । कारको मुनि च्यापिएको अवस्थामा रहेका उनलाई ति वर्दीधारीले घाँटीमा घुँडाले च्यापिरहेको दृश्य देख्न सकिन्छ । फान्सका थुरामका बुवा लिलियन विश्व विजेता तथा एन्टिी रेसिस्ट एक्टिभिस्ट र अभियानकर्ता हुन् ।

८१औं मिनेटमा एलासेनले गोल गर्दै मोन्चेनग्लाडवाचलाई ४–१ को सहज जित दिलाए ।