एजेन्सी – खेलाडी अनुबन्धमा स्पेनिस महारथी रियल म्याड्रिड अग्रपङ्तिमा आउने क्लब हो । टोलीलाई बलियो बनाउन महँगो मुल्य खर्चन पछि नपर्ने रियललाई यसपटक ट्रान्सफर विन्डोमा खेलाडी अनुबन्ध गर्न कठिन पर्ने देखिएको छ । क्लबले खेलाडी अनुबन्ध नै नगर्ने सम्मको योजना तयार गरिरहेको छ ।

स्पेनिस पत्रिका मार्काका अनुसार कोरोना भाइरस (कोभिड–१९) का कारण क्लबमा परेको आर्थिक समस्याका कारण रियलले यो सिजन कुनै पनि खेलाडी अनुबन्ध नगर्ने योजनामा रहेको उल्लेख गरिएको छ । रियलले यो सिजन फ्रेन्च फरवार्ड केलियन एमबाप्पे, पउल पोग्वा, बोरुसिया डर्टमुन्डका एर्लिङ ब्राउट हालान्ड र रेनिसका एडुआर्डाे कामाभिंगालगायतका खेलाडी अनुबन्ध गर्ने योजना बनाएको थियो ।

क्लबको आर्थिक अवस्था कमजोर रहेको कारण नयाँ खेलाडीमा खर्च गर्न नसक्ने अवस्था आएको बताएपनि क्लबमा रहेका केही खेलाडी बेचेर रियलले नयाँ खेलाडी अनुबन्ध गर्न सक्नेछ । कोरोनाका कारण रियलको विभिन्न आम्दानीका स्रोतहरु बन्द भएका छन् । क्लबको आर्थिक अवस्था सुधार गर्न क्लबका पदाधिकारीले खेलाडी र कर्मचारीको तलवमा केही कटौती गर्नसक्ने योजना पनि अघि सारेका छन् ।

ला लिगा सुचारु भएपनि बन्द रंगशालामा खेलाइदा रियललाई १३५ मिलियन पाउन्ड घाटा हुनेछ । टिकट बिक्री र स्टेडियमको मार्केटिङबाट पैसा नउठ्दा रियललाई घाटा हुनेछ । सोही कारण रियलको बोर्ड बैठकले यो सिजनमा कुनैपनि खेलाडी नभित्र्याउने बारे चर्चा चलेको मार्काले जनाएको छ । यस्तो निर्णय भएमा रियलले यो सिजन जतिपनि खेलाडी क्लबमा अनुबन्ध गर्ने चर्चा चलेको थियो, त्यो सबै अर्काे समरको लागि थाती रहनेछ ।

दुई खेलाडी डर्टमुन्डका हालान्ड र रेनिसका कामाभिंगा यो समरमा स्पेनिस क्लब रियलमा अनुबन्ध हुने तयारी थियो । हालान्डलाई रियलको करिम बेन्जेमाको विकल्पको रुपमा तथा कामाभिंगालाई क्यासमिरोको विकल्पमा अघि सारिएको थियो । फ्रेन्च एमबाप्पे र पउल पोग्बा पनि रियलले यो समरमा अनुबन्ध गर्ने खेलाडीको सुचीमा रहेका थिए । एमबाप्पेलाई रियलले लामो समयको लागि अनुबन्ध गर्ने योजना बुन्दै आएको छ ।