एजेन्सी – पोर्चुगिज स्टार क्रिस्टियानो रोनाल्डो विश्व खेलकुदमा सर्वाधिक कमाउने खेलाडी सुचिमा दोस्रो स्थानमा छन् । रोनाल्डोले मैदानभित्र युभेन्टसको जर्सीमा खेल्दा पारिश्रमिक त लिन्छन् नै, त्यसबाहेक मैदानबाहिर पनि उनले प्रायोजन तथा अन्य विविध कार्यक्रमबाट आर्थिक आयआर्जन गर्छन् ।

सन् २०१३ मा रोनाल्डोले एक कार्यक्रमका लागि लिएको पारिश्रमिकबारे जर्मनीको एक पत्रिकाले विस्तृत विवरण सार्वजनिक गरेको छ । डेर स्पिगलका राफेल बुस्म्यान र माइकल वुल्जिंगरले सन् २०१७ मा विवरण सार्वजनिक गर्दा नै रोनाल्डोले महँगो रकम असुलेको खुलेको छ । रोनाल्डोले सन् २०१३ मा साउदी अरेबियाको मोबाइल सेवा प्रदायक मोबिलिले साढे चार घण्टा समय लिएको थियो ।

यस साढे ४ घण्टा समयमा उक्त कम्पनिले रोनाल्डोको फोटोसुट गर्ने कार्यक्रम रहेको थियो । यसका साथै रोनाल्डोले ५ ओटा हस्ताक्षरअंकित जर्सी र आफ्नो सामाजिक संजालमा दुई ओटा पोस्ट गर्ने सहमति भएको थियो ।

रोनाल्डोको उक्त दिन खिचिएको तस्बिर मोबिलिले मध्येपूर्वी र उत्तर अफ्रीका क्षेत्रमा मात्र विज्ञापन गर्नका लागि पाउने सम्झौता भएको थियो । रोनाल्डोले साढे ४ घण्टाका लागि ९ लाख २० हजार पाउण्ड अर्थात १३ करोड नेपाली रुपैयाँ लिएका थिए । झन्डै ७ वर्षअघि लिएको यो रकम अहिले आउँदा रोनाल्डोको उचाईसँगै थप बढेको सहजै अनुमान गर्न सकिन्छ ।

सन् २०१६ मा रोनाल्डोले खेलकुद सामग्री कम्पनि नाईकसंग गरेको सम्झौताबारे पनि डेर स्पिगलले विवरण प्राप्त गरेको छ । अमेरिकी कम्पनि नाईकसँग रोनाल्डोले १० वर्षको लागि सम्झौता गरेका थिए । रोनाल्डोले लामो समयदेखि नाईकसँग सहकारी गर्दै आएकोमा एकैपटक १० वर्ष सम्झौता गरेका थिए ।

यस सम्झौताका अनुसार रोनाल्डोले हरेक वर्ष १३.८ मिलियन पाउण्ड अर्थात् २ अर्ब २२ करोड नेपाली रुपैयाँ प्राप्त गर्ने छन् । रोनाल्डोले शीर्ष श्रेणी क्लबबाट खेलुन्जेल यो सम्झौता मान्य हुने उल्लेख छ । यसबाहेक रोनाल्डोले व्यक्तिगत उपाधि जितेको खण्डमा ४ मिलियन युरो अर्थात् ५३ करोड नेपाली रुपैयाँ पाउने छन् ।

फोर्ब्सले जारी गरेको विवरण अनुसार रोनाल्डोले गतवर्ष १ सय ५ मिलियन अमेरिकी डलर आर्जन गरेका थिए । यसमध्य ४५ मिलियन प्रायोजन र ६० मिलियन डलर तलब र पुरस्कारमा प्राप्त गरेका थिए । रोनाल्डोको वार्षिक आय नेपाली रुपैयाँमा १२ अर्ब ७० करोड हुन आउँछ ।