एजेन्सी – म्यानचेस्टर युनाइटेडले नाइजेरियन फरवार्ड ओडीओन इघालीको लोन सम्झौतालाई थप गर्दै यस वर्षको अन्त्यसम्म क्लबमा रहने सम्झौता गरेको छ ।

चिनिया क्लब सांघाई सेन्हुआबाट लोनमा आएका इघालोको सम्झौता मे महिनामा अन्त्य हुने थियो । तर कोरोनाका कारण सिजन अन्त्य हुन नसक्दा युनाइटेडले उनलाई क्लबमा राख्न प्रयास थालेको थियो । सेन्हुआले सुरुवातमा युनाइटेडको प्रस्ताव अस्विकार गरेपनि पछिल्लो छलफलबाट निकास निस्किएको हो ।

यसअघि वाटफर्डबाट समेत खेलेका इघालो पनि युनाइटेडमा नै रहन चाहन्थें । उनले युनाइटेडबाट ८ खेल खेलिसकेका छन् । उनले यसक्रममा ३ खेलमा सुरुवात गर्दै ४ गोल समेत गरेका छन् । नयाँ सम्झौता अनुसार इघालो अब जनवरी २०२१ सम्म युनाइटेडमा नै रहनेछन् ।

युनाइटेडले सुरुवातमा इघालोलाई स्थायी रुपमा अनुबन्धन गर्न खोजेपनि चिनियाँ क्लबले उक्त प्रस्ताव भने नकारेको छ । क्लबले उनलाई चीनको सुपर लिगको सुरुवातमा नै क्लबमा राख्न चाहेपनि अब उनी जनवरीपछि मात्र क्लबमा जानेछन् ।

प्रिमियर लिग अब जुन १७ मा सुचारु हुने तयारी रहेको छ । लकडाउनको समयमा युनाइटेडका घाइते खेलाडीद्वय मार्कस रासफर्ड र पल पोग्बा पनि पुनरागमनका लागि तयार भएका छन् । मिडफिल्डर ब्रुनो फर्नान्डेसको आगमनले युनाइटेड थप मजबुत भएको छ ।