एजेन्सी – क्याटलान क्लब बार्सिलोनाले कोरोना भाइरस (कोभिड–१९) को महामारीपछि दुई खेल खेल्दै शतप्रतिशत जित आत्मसात गरिसकेको छ ।

कोरोनापछिको खेलमा एक टोलीले पाँच खेलाडी परिवर्तन गर्न पाउने नियम राखिएको छ । यसअघि एक खेलमा तीन खेलाडी मात्रै प्रयोग गर्न पाउने प्रावधान रहेको थियो । यसक्रममा बार्सिलोनाका प्रशिक्षक क्वीके सेटिनले दुई खेल (रियल मालोर्का र लेगानेस) विरुद्धको खेलमा २० खेलाडी प्रयोग गरेका छन् । कप्तान लियोनेल मेस्सी र गोलरक्षक मार्क आन्द्रे टेर स्टेगनले मात्रै दुई खेल (१८० मिनेट) मैदानमा बिताएका छन् ।

मार्क आन्द्रे टेर स्टेगन

जर्मन गोलरक्षक मार्क आन्द्र टेर स्टेगनले कोरोनापछिको दुई खेल (रियल मालोर्का र लेगानेस) विरुद्ध पुरा समय मैदान बिताउँदै क्लिन सिट राख्न सफल छन् । स्टेगन पछिल्लो समय लयमा नरहेपछि क्लबले बेच्ने मनासय बनाएको थियो । उनको यो प्रदर्शनले उनले बाँकी खेलमा पनि सुरुवातमा खेल्ने सम्भावना रहेको छ ।

सर्जी रोबर्टाे 

राइट ब्याक सजी रोबर्टाेले प्रशिक्षक सेटिनको अन्डरमा मालोर्का र लेगानेसविरुद्धको खेलमा शुरुवातमा मौका पाएका छन् । उनले मालोर्काविरुद्ध ७० मिनेट तथा लेगानेसविरुद्ध ५३ मिनेट मैदानमा बिताए । बार्सिलोनाको ला मासियाको उत्पादन रोवर्टाेले नेल्सन सेमेडोसँग प्रतिस्पर्धा गर्नु परिरहेको छ । यो पोजिसन कसले खेल्न भन्ने अनुमान नै गर्न सकिदैन ।

जेरार्ड पिके

भेट्रान डिफेन्डर जेरार्ड पिकेले पहिलो खेलमा पुरै समय मैदानमा बिताएका छन् । लेगानेसविरुद्ध पिकेले ७२ मिनेट मैदानमा बिताए । लेगानेसविरुद्ध खराव ट्याकलमा परेपछि प्रशिक्षक सेटिनले उनलाई प्रतिस्थापन गरे । तर, उनी बार्सिलोनाको लागि महत्वपुर्ण खेलाडी रहेका छन् ।

रोनाल्ड एराउजो

उरुग्वेका युवा स्टार रोनाल्ड एराउजोले मालोर्काविरुद्धको खेलमा पूरा समय बिताउँदा प्रभावशाली प्रदर्शन गरेपनि उनी लेगानेसविरुद्धको खेलमा सेटिनको रोजाईमा पर्न सकेनन् । सेभियाविरुद्ध उनले मौका पाउने सम्भावना छ । तर, यो प्रशिक्षकको हातमा नै हुनेछ ।

क्लेमेन्ट लेङ्लेट

चोटका कारण फ्रेन्च डिफेन्डर क्लेमेन्ट लेङ्लेटले मालोर्काविरुद्धको खेल गुमाएका थिए । लेगानेसविरुद्ध पहिलो रोजाईमा पर्दै प्रभावशाली प्रदर्शनसहित एक सम्भावित गोललाई गोललाइनबाट बचाएका कारण उनले सेभियाविरुद्धको खेलमा पनि पहिलो रोजाईमा मौका पाउने सम्भावना छ । स्यामुइल उम्टिटीले पाँचौ कार्ड पाएका कारण लेङ्लेटले अर्काे खेलमा पिकेसँगै शुरुवातमै खेल्न पाउने सम्भावना रहेको छ ।

स्यामुइल उम्टिटी

स्यामुइल उम्टिटीले दुई खेलमा मात्रै २० मिनेट मैदानमा बिताएका छन् । लेगानेसविरुद्ध पँहेलो कार्ड पाएका कारण उनले सेभिया भ्रमण गुमाउनेछन् ।

नेल्सन सेमेडो

नेल्सन सेमेडोले दुवै खेलमा सब्सिच्युट खेलाडीको रुपमा मैदान प्रवेश गरेका छन् । मालोर्काविरुद्ध २० मिनेट मैदान बिताएका सेमेडोले लेगोनसविरुद्धको खेलमा ४० मिनेट खेलेका छन् । उनले सेभियाविरुद्ध पहिलो रोजाईमा खेल्न पाउने सम्भावना छ ।

जोर्डी अल्वा

रियल मालोर्काविरुद्धको खेलमा पहिलो रोजाईमा खेल्दै १ गोल र एक असिस्ट दिएका उनी लेगानेसविरुद्धको खेलमा प्रतिबन्धका कारण मैदान उत्रन पाएनन् । उनी सेभियाविरुद्धको खेलमा पहिलो रोजाईमा खेल्न पाउने सम्भावना छ ।

जुनिअर फिर्पाे

युवा फुलब्याक जुनिअर फिर्पाेले दुवै खेलमा मौका पाएका छन् । मालोर्काविरुद्ध अन्तिम ६ मिनेट मैदानमा बिताएका फिर्पाेले लेगानेसविरुद्धको खेलमा जोर्डी अल्वाको अनुपस्थितिमा पुरा समय खेल्न पाएका थिए । सेभियाविरुद्धको खेलमा अल्वा उपस्थित हुने भएका कारण उनी पुनः बेञ्चमा थन्किनेछन् ।

सर्जियो बुस्क्वेट्स

सर्जियो बुस्क्वेट्सले दुवै खेलमा शुरुवातमा मौका पाइरहेका छन् । उनले सेभियाविरुद्ध पनि पहिलो रोजाईमा खेल्ने सम्भावना छ । प्रशिक्षक सेटिनले उनको आवश्यकतालाई महसुस गर्दै टिमको प्रदर्शन अनुसार उनलाई प्रतिस्थापन गरिरहेका छन् ।

फ्रान्की डि जोङ

डच मिडफिल्डर फ्रान्की डि जोङले रियल मालोर्काविरुद्ध ८३ मिनेट मैदानमा बिताए । चोटका कारण उनले लेगानेसविरुद्धको खेल गुमाउन पुगेका थिए । सेभियाविरुद्धको खेलमा फिट हुने र पहिलो रोजाईमा खेल्ने अनुमान गरिएके छ ।

आर्टुरो भिडाल

चिलियन फरवार्ड आर्टुरो भिडाले मालोर्काविरुद्ध उत्कृष्ट शुरुवात गर्दै खेलको दोस्रो मिनेटमा नै गोल गर्न सफल भएका थिए । लेगानेसविरुद्धको खेलमा उनी ६३औं मिनेटमा मैदान प्रवेश गरेका थिए । दुवै खेलमा राम्रो प्रदर्शन गरेका कारण उनले सेभियाविरुद्धको खेलमा पनि मौका पाउने सम्भावना छ ।

इभान राकिटिच

क्रोएसियन मिडफिल्डर इभान राकिटिचले दुवै खेलमा गरेर १३५ मिनेट मैदानमा बिताए । उनको अनुभव बार्सिलोनाका लागि प्रभावकारी हुने भएपनि उनी दुवै खेलमा केही फिक्का देखिए ।

अर्थर

ब्राजिली स्टार मिडफिल्डरले मालोर्का र लेगानेसविरुद्धको दुवै खेल खेले । मालोर्काविरुद्ध दोस्रो हाफमा मैदान छिर्दै २० मिनेट खेलेका अर्थरले लेगानेसविरुद्ध पहिलो रोजाईमा पर्दै ७२ मिनेट खेलेका थिए । तर, प्रशिक्षक सेटिन अर्थरलाई भन्दा पनि भिडाल र राकिटिचलाई मन पराउछन् । बुस्क्वेट्स र डि जोङपनि सेटिनको पहिलो रोजाईमा रहने छन् ।

रिकी पुज

युवा स्टार रिकी पुजले लेगानेसविरुद्ध अन्तिम २० मिनेट मैदानमा बिताए । उनले खेलमा आफ्नो प्रभाव जमाए । पछिल्लो नियम अनुसार ५ खेलाडी परिवर्तन गर्न पाउने भएका कारण उनले अब बाँकी खेलमा समेत खेल्ने सम्भावना छ । तर, सेभियाविरुद्धको महत्त्वपूर्ण खेलमा भने पहिलो रोजाईमा मौका पाउने सम्भावना निकै न्युन छ ।

लियोनेल मेस्सी

कप्तान लियोनेल मेस्सी दुवै खेलमा पुरा समय मैदान बिताउने खेलाडी हुन् । उनले दुई खेलमा दुई गोल र दुई असिस्ट दिएका छन् । उनीबाट सेभियाविरुद्धको खेलमा पनि यस्तै प्रदर्शनको अपेक्षा गरिएको छ ।

एन्टोइन ग्रिजमन

फ्रेन्च फरवार्ड एन्टोइन ग्रिजमनले दुवै खेलमा अवसर पाएका छन् । मालोर्काविरुद्ध ६० मिनेट मैदानमा बिताएका ग्रिजमनले लेगानेसविरुद्ध पुरै समय खेल्ने अवसर पाएका थिए । लेगानेसविरुद्ध गोल गरेपनि उनको गोलले मान्यता पाएन ।

लुइस सुआरेज

उरुग्वेली स्टार फरवार्डले कोरोनापछिको दुवै खेलमा सब्सिच्युट खेलाडीको रुपमा मैदानमा प्रवेश पाएका छन् । जनवरीमा चोटका कारण मैदान बाहिर रहेका उनको आगमनले बार्सिलोना बलियो देखिएको छ । मालोर्काविरुद्ध सुआरेजले मेस्सीको गोलमा असिस्ट दिएका थिए ।

मार्टिन ब्रेथवेट

जनवरीमा आकस्मिक खेलाडीको रुपमा बार्सिलोना आएका मार्टिन ब्रेथवेटले मालोर्काविरुद्ध पहिलो रोजाईमा खेल्दै गोल गर्न पनि सफल भए । तर, उनले आफ्नो पुर्व क्लब लेगानेसविरुद्ध खेल्न पाएनन् । लेगानेसविरुद्धको विश्रामले उनले सेभियाविरुद्धको खेलमा मौका पाउने सम्भावना छ । तर, यो प्रशिक्षककै रणनीतिमा भर पर्नेछ ।

अन्सु फाती

ला मासियाका उत्पादन अन्सुफातीले मालोर्काविरुद्ध खेल्न नपाएपनि लेगानेसविरुद्ध पहिलो रोजाईमा खेल्दै गोल गर्न सफल भए । उनलाई दोस्रो हाफमा सब्सिच्युट गरिएको थियो । यसको अर्थ फातीलई सेटिनले फ्रेस राख्दै सेभियाविरुद्ध खेल्न सक्ने सम्भावनाको रुपमा हेरिएको छ ।