एजेन्सी – जर्मन बुन्डेसलिगामा बोरुसिया डर्टमुन्ड तुलनात्मक रुपमा कमजोर प्रतिद्धन्द्धी माइन्जसँग स्तब्ध बनेको छ । डर्टमुन्ड घरेलु मैदानमा माइन्जसँग २–० ले स्तब्ध बनेको हो ।

बायर्न म्युनिख लगातार आठौं सिजन बुन्डेसलिगा च्याम्पियन बनेको भोलिपल्ट डर्टमुन्डको प्रदर्शन निकै फितलो बनेको थियो । डर्टमुन्डमाथिको जितमा माइन्जका जोनाथन बुकार्ड र जिन फिलिपे मटेटाले गोल गरे ।

सिग्नल इडुना पार्कमा बुधबार राति भएको खेलमा डर्टमुन्डसँग दवावमा खेलिरहेको माइन्जले काउन्टर एट्याकमा केही आक्रमण बुन्ने प्रयास गरिरहेको थियो । ३३औं मिनेटमा बोटे बाकुको उत्कृष्ट क्रसमा जोनाथनले गोल गर्दै घरेलु टोलीविरुद्ध माइन्जलाई अग्रता दिलाए । ३६औं मिनेटमा डर्टमुन्डले बराबरीको अवसर गुमायो । कर्नरमा माइन्जका लाट्जाको हेडरलाई आफ्नै गोलरक्षक फ्लोरियन मुलरले बचाए ।

४९औं मिनेटमा माइन्जले पेनाल्टीमार्फत अग्रता दोब्बर पार्‍यो । गोलरक्षक रोमन बुर्कीले माटेटाको प्रहारलाई बचाएपनि रिवाउन्डमा ओनिसिओले ड्यानी लाट्जालाई पास दिएपनि म्याट हमेल्सले लाट्जामाथि फउल गर्न पुगेपछि रेफ्रीले माइन्जलाई पेनाल्टी प्रदान गरेको थियो । जसमा मटेटा चुकेनन् ।

खेलमा २–० ले पछि परेको डर्टमुन्डले बल पोजेसन राखेपनि गोलको लागि उल्लेख्य आक्रमण बुन्न नसक्दा डर्टमुन्ड घरेलु मैदानमै २–० ले स्तब्ध बन्न पुग्यो । ७० प्रतिशत बल पोजेसन राखेको घरेलु टोलीले माइन्जविरुद्ध गतिलो आक्रमण बुन्न सकेन । अग्रपङ्तिका एर्लिङ ब्राउट हालान्ड, जाडोन सान्चो र थोर्गन हाजार्डको प्रदर्शन निकै फितलो बनेको थियो ।

हारपछि डर्टमुन्ड ६६ अंक जोडेर दोस्रो स्थानमा यथावत रहँदा माइन्जलाई जितले केही राहत मिलेको छ । माइन्ज रेलिगेसन जोनभन्दा माथि उठेको छ । माइन्जको ३४ अंक पुगेको छ । रेलिगेसन प्ले अफको स्थानमा रहेको फोर्टुना डुसेलडर्फको २९ अंक छ ।