एजेन्सी – स्पेनिस क्लब एटलेटिको म्याड्रिडका गोलरक्षक यान ओब्लाकले स्पेनिस ला लिगामा नयाँ कीर्तिमान कायम गरेका छन् ।

ओब्लाक स्पेनिस लिगको इतिहासमा सर्वाधिक कम खेल खेल्दै १ सय क्लिनसिट राख्न सफल गोलरक्षक बनेका हुन् । बुधबार ओसासुनाविरुद्ध ५-० को जित दर्ता गरेपछि ओब्लाकले १ सय क्लिनसिटको कोसेढुंगा पार गरेका हुन् । उनले १ सय ८२ औं खेल खेल्दै १ सय क्लिनसिट दर्ता गरे ।

यसअघि स्पेनिस लिगमा सर्वाधिक कम खेलमा १ सय क्लिन सिट राख्ने कीर्तिमान मिगुएल रेइनाको नाममा थियो । उनले २ सय २२ खेल खेल्दै यो उपलब्धि हासिल गरेका थिए । क्याटलान क्लब बार्सिलोनाका पूर्व गोलरक्षक भिक्टर भाल्डेस सूचिको तेस्रो स्थानमा छन् । उनले २ सय २७ खेलमा यो सफलता हात पारेका थिए ।

ओब्लाकले खेलेका ५५ प्रतिशत खेलमा क्लिन सिट राखेका छन् । लिगमा विगतदेखि खेल्दै आएका उत्कृष्ट गोलरक्षकका तुलनामा यो निकै रामोर तथ्यांक हो । एन्डोनी जुबीजारेटाले ६ सय २२ खेलमा २ सय ३५ क्लिनसिट राखेका थिए । पाको बुयोले ५ सय ४२ खेलमा २ सय १३ तथा इकर कासीलासले ५ सय १० खेलमा १ सय ७७ पटक गोल खाएका थिएनन् ।

ओब्लाकले यसक्रममा एटलेटिकोको इतिहासमा सर्वाधिक क्लिनसिट राख्ने कीर्तिमान पनि बनाए । उनले ९६ क्लिनसिट राखेका अबेल रेसिनोलाई उछिनेका हुन् । उनी लिगमा १ सय क्लिनसिट राख्न सफल एकमात्र विदेशी खेलाडी समेत हुन् ।