एजेन्सी – कोप्पा इटालियाको फाइनलमा नेपोलीले युभेन्टसलाई पराजित गर्दै उपाधि जितेपछि स्टार फरवार्ड क्रिस्टियानो रोनाल्डोको बहिनीले प्रशिक्षक माउरिजियो सार्रीमाथि प्रश्न उठाएकी छिन् ।

इटालीमा फुटबल फर्किएपछिको लगातार दोस्रो खेलमा युभेन्टसले गोलरहित बराबरी खेलेको थियो । यसअघि कोप्पा इटालियाको सेमिफाइनलमा नै एसी मिलानसँग दोस्रो लेगमा युभेन्टस रोकिएको थियो । उक्त खेलमा रोनाल्डोले पेनाल्टीमा गोल गर्न सकेका थिएनन् । त्यसका बाबजुद पनि युभेन्टस समग्र नतिजाको आधारमा फाइनल पुगेको थियो ।

बुधबार भएको फाइनलमा निर्धारित ९० मिनेटको खेल गोलरहित बराबरीमा टुंगिएपछि खेलको नतिजा टाइब्रेकरबाट लिइएको थियो । टाइब्रेकरमा नेपोली ४-२ ले विजयी रहयो । युभेन्टसका लागि सुरुवाती दुई प्रहर असफल भएका थिए ।

युभेन्टसका लागि खेलमा पहिलो रोजाईमा पेनाल्टी प्रहार गर्ने भएपनि टाइब्रेकरमा प्रहार गर्न नआएको भन्दै समर्थकले रोनाल्डोको चर्को आलोचना गरेका छन् । समर्थकहरुले रोनाल्डोले आफैं पाँचौ नम्बरमा पेनाल्टी हान्ने निर्णय लिँदा टोलीलाई भन्दा आफ्नो बारे सोचेको आरोप लगाएका छन् । सामाजिक संजालमा उनको निर्णयलाई लिएर टिप्पणी भएको छ ।

यता रोनाल्डोकी बहिनी एल्मा एभिएरोले भने आफ्नो दाइको बचाउ गर्दै रोनाल्डो एक्लैले खेल जिताउन नसक्ने बताएकी छिन् । उनले प्रशिक्षक सार्रीको रणनीति काम नगर्दा नै युभेन्टसले फाइनलमा पराजित हुन पुगेको बताइन् । उनले सार्रीको रणनीतिमा रोनाल्डोको प्रतिभा पूरा मैदानमा नदेखिने पनि बताइन् ।

उनले इन्स्टाग्राममा लेखेकी छिन्, ‘ योभन्दा बढी के नै गर्न सकिन्छ ? गर्न सकिने मात्र यति नै हो । आफू एक्लैले मात्र जादु गरेर खेल जित्न सकिन्न । मलाई थाहा छैन तिमीले कसरि खेलिरहेको छौ । सिर उँचो गर, मेरो राजा ।’

खेलपछि सार्रीले आफ्नो खेलाडीहरुलाई केहि पनि नभनेको बताए । हारपछि स्तब्ध सार्रीलाई पोस्ट म्याच कन्फरेन्समा रोनाल्डोको खराब प्रदर्शनबारे प्रश्न गर्दा उनले फिटनेसमा नै समस्या रहेको अभिव्यक्ति दिए ।

‘ रोनाल्डो, पाउलो डिबाला र डग्लस कोस्टा सबै एकै स्तरमा छन् । रोनाल्डो आफ्नो स्तरमा खेल्न भने सकिरहेका छैनन् ,’ सार्रीले भने, ‘ मैले खेलपछि केहि पनि बोलेको छैन । म पनि उनीहरु जस्तै दुखि छु । यो बेला शान्त भएर बस्नु उचित हुन्छ ।’

यो पनि पढ्नुहोस : फुटबल र क्रिकेट दुवै खेलेका ५ स्टार खेलाडी