एजेन्सी – स्पेनिस ला लिगामा बिहीबार राति डिपोर्टिभो एलाभेससँगको हारसँगै रियल सोसिडाडले शीर्ष चारमा पर्ने मौका गुमाएको छ । रियल सोसिडाड घरेलु टोलीसँग २–० ले पराजित भएसँगै शीर्ष चारमा पुग्नबाट वञ्चित बनेको हो । 

एलाभेसविरुद्ध जित निकाल्न सकेको भए र रियल सोसिडाडले एट्लेटिको म्याड्रिड र गेटाफेलाई पछि पार्दै शीर्ष चारमा स्थान बनाउने थियो । तर, रियल सोसिडाडले खेल आफ्नो पक्षमा पार्न सकेन ।

हारसँगै रियल सोसिडाड २९ खेलबाट ४७ अंक जोडेर छैटौं स्थानमा रहेको छ । यो स्थान अर्काे सिजन युरोपा लिगको लागि छनोट योग्य हुने स्थान हो । रियल सोसिडाडलाई हराएको एलाभेस ३५ अंक जोडेर १२औं स्थानमा उक्लिन सफल भएको छ ।  खेलमा बल पोजेसनमा पकड बनाएपनि रियल सोसिडाडले घरेलु टोलीविरुद्ध गतिलो आक्रमण बुन्न नसक्दा पहिलो हाफ गोलरहित बराबरीमा टुंगिएको थियो ।

५६औं मिनेटमा बोर्जा सेइनजले गोल गर्दै घरेलु टोलीलाई अग्रता दिलाए । खेलको अन्त्यतिर दुवै टोली १० खेलाडीमा समेटिन पुगेको थियो ।
एक गोलले पछि परेको रियल सोसिडाडका जोसेवा जाल्डुआ दोहोरो पँहेलो कार्डसहित मैदानबाट बाहिरिए ।

त्यसपछि घरेलु टोलीका थोमस पिना ८७औं मिनेटमा दोहोरो पँहेलो कार्डसहित मैदानबाट बाहिरिदा दुवै टोली १० खेलाडीमा समेटिएको थियो । तर, इन्ज्युरी समयको थप गरिएको छैटौ मिनेटमा मार्टिन एगुइररेगाविरियाले गोल गर्दै एलाभेसलाई २–० को जित दिलाए ।