काठमाडौं (हाम्रो खेलकुद)– प्रतिनिधि सभामा अखिल नेपाल फुटबल संघ (एन्फा) को विषय फेरि उठेको छ । यस पटक एन्फाको पछिल्लो निर्णयका विषयलाई लिएर भक्तपुरका सांसद प्रेम सुवालले प्रश्न उठाएका हुन् । उनले भक्तपुर जिल्ला फुटबल संघ विघठन गर्नु उपयुक्त नभएको भन्दै पुरानै संघलाई यथावत काम गर्न दिनु पर्ने माग राखेका थिए । 

‘नेकपाको सरकारको खेलकुद मन्त्रालय अन्तर्गतको अखिल नेपाल फुटबल संघले हुकुमी शैलीमा असार २ गते गौतम सुजखु नेतृत्वको निर्वाचित भक्तपुर जिल्ला फुटबल संघ विघठत गरेको उपयुक्त होइन,’सुवालले बिहीबार प्रतिनिधि सभामा भने,’ निर्णय फिर्ता गरि पुरानो संघलाई यथावत काम गर्न दिन आवश्यक छ । ‘

यसअघि एन्फा अध्यक्ष कर्मा छिरिङ शेर्पाले एक अन्तवार्ताका क्रममा तराई तिर राष्ट्रिय अलि कमी रहेको बताएपछि उनलाई कारवाही संसदमा आवाज उठेको थियो ।

छानविन समितिको प्रतिवेदनका आधार देखाउँदै एन्फाले मंगलबार भक्तपुर जिल्ला फुटबल संघलाई पूर्न गठन गरेको छ । एन्फा कार्यसमितिको आपकालिन बैठकले किशोर हेक्काको अध्यक्षतामा १३ सदस्यीय भक्तपुर जिल्ला तदर्थ समिति गठन गरेको हो ।

कोभिड १९ का कारण सरकारले गरेको लकडाउनको पूर्ण रुपमा अन्त्य भए पश्चातको ६ महिना भित्रको कार्यदेश रहने गरि तदर्थ समिति गठन गरेको उल्लेख गरेको थियो । गौतम सुजखुको अध्यक्षमा रहेको कार्यसमितिलाई एन्फाले कारवाही गर्नुपर्ने थ्रुपै कारण उल्लेख गरेको थियो ।

२०७६ साउन १४ गते आपतकालिन समितिको बैठकबाट गठित छानविन समितिले दिएको प्रतिवेदनको आधारमा कारवाही गरेका जनाएको छ । एन्फाको निर्देशन नियमावली र कानुनी प्रक्रिया समेतको उल्लंघन गरि जिल्ला लिग समेत सञ्चालन गरेको, विधान अनुसार क्लब दर्ता नभएको र क्लब संख्या समेत नपुर्याई जिल्ला संघको गतिविधि सञ्चालन गरेको पाइएकाले एन्फाले जनाएको थियो ।

त्यस्तै क्लब दर्तामा कानुनी प्रक्रिया पुरा नगरेको, टिम दर्ता एवंम नविकरण नगरेको, आफु अनुकुलको रकम उल्लेख गयर निर्देश र नियम विपरित तवरले रकम उठाई लिग सञ्चालन गरेको तथा जिल्ला लिग सञ्चालनमा प्रक्रियागत त्रुटी समेत रहेको पाइएको एन्फाले बताएको थियो ।

सुजखु काठमाडौं, ललितपुर र धादिङ जिल्ला अध्यक्षसँगै एन्फा र एन्फा अध्यक्ष कर्मा छिरिङका विरुद्ध विभिन्न निकायमा उजुरी गर्दै आएका छन् । कतिपयले भक्तपुर जिल्ला पूर्नगठनलाई त्यो सँग जोडेर पनि हेरेका छन् । ललितपुर जिल्ला संघका अध्यक्ष पुरुषोत्तम थापालाई पनि एन्फाले अनुसासनको कारवाही गर्दै अर्को साधारण सभा सम्मका लागि निलम्बन गरेको थियो ।