एजेन्सी – इंग्लिस प्रिमियर लिगमा आज राति दुई खेल हुँदैछ। रेलिगेसन जोनमा रहेको नर्विच सिटीले साउथह्याम्पटनको आतिथ्यता गर्दा ओले गनर सोल्सायरको म्यानचेस्टर युनाइटेड टोटेनहम हट्स्परको मैदानमा खेल्दैछ ।

नर्विच र साउथह्याम्पटनको खेल नेपाली समयअनुसार राति १०ः४५ बजे तथा टोटेनहम र युनाइटेडबीचको खेल राति १ बजे हुनेछ । घरेलु मैदानमा हुने खेलमा टोटेनहम ह्यारी केन र ह्युङ मिन सनको आगमनले उत्साहित रहेको छ । ह्यामस्ट्रिङ इन्ज्युरीका कारण केन जनवरी देखि मैदान बाहिर रहेका थिए ।

केनले नयाँ वर्षको पहिलो दिन साउथह्याम्पटनसँग १–० ले पराजित भएको खेलमा दोस्रो हाफमा चोट बोक्दै मैदानबाट बाहिरिएका थिए । यस्तै सनले फ्रेब्रुअरी १६ मा एस्टन भिल्लामाथि ३–२ को संघर्षपुर्ण जित निकालेको खेलमा दायाँ हातमा चोट बोक्न पुगेका थिए । उनका दाँया हात भाँचिएको थियो । यि दुवै खेलाडी चोटमुक्त हुदै पहिलोपटक खेल्न लागेका हुन् ।

कोरोना महामारीका कारण मार्चदेखि प्रिमियर लिग स्थगित भएपछि केन र सनले पुनः खेल्ने अवसर पाएका हुन् । मेडिकल रिपोर्ट अनुसार केन र सनले सिजन गुमाउने पक्का थियो ।  केन र सनको आगमनसहित उत्साहित बनेको टोटेनहम घरेलु मैदानमा म्यानचेस्टर युनाइटेडलाई पराजित गर्दै लक्ष्यमा मैदानमा उत्रनेछ ।

दुवै टोलीको लागि यो खेल उत्तिकै महत्वपुर्ण रहेको छ । आठौं स्थानमा रहेको टोटेनहमले युनाइटेडलाई पराजित गरेको अवस्थामा छैटौं स्थानमा उक्लनेछ । हार या बराबरीले सोही स्थानमा नै यथावत रहनेछ । टोटेनहमका लागि केन र सनसँगै ह्यारी विङ्कस, टान्गी एनडोम्वेले, सर्जी औरिएर र गोलरक्षक ह्युगो लोरिस रहनेछन् । डेल अली प्रतिबन्धका कारण उपस्थित नहुँदा जियोभानी लो सेल्सो र जुआन फोयथ चोटका कारण खेल्नेमा शंका रहेको छ ।

यता, म्यानेचेस्टर युनाइटेड पनि टोटेनहमलाई पराजित गर्दै कम्तीमा पनि दुई दिन शीर्ष चारमा पुग्नेछ । चौथो स्थानको चेल्सीसँग अंक बराबरी भएपनि गोल अन्तरमा युनाइटेड चौथो स्थानमा उक्लने छ । त्यसैले युनाइटेड टोटेनहमविरुद्ध निश्चित जितकै लागि खेल्नेछ । युनाइटेडका लागि मार्कस रासफोर्ड, एन्थोनी मार्सियल, ब्रुनो फर्नान्डेज, फ्रेड, पल पोग्वा र नेमान्जा माटिक जस्ता खेलाडीहरु रहेका छन् ।

पछिल्लो पाँच खेलमा युनाइटेडले टोटेनहमसँग हार बेहोरेको छैन । २०१८ फ्रेब्रुअरीमा प्रिमियर लिगको खेलमा २–० ले पराजित भएयता, युनाइटेडले सबै (५) खेलमा जित निकालेको छ । सोही जितलाई युनाइटेड निरन्तरता दिने चहाँन्छ । यता, टोटेनहम युनाइटेडसँगको लगातारको हारको बदला लिने दाउमा हुनेछ ।