काठमाडौं (हाम्रो खेलकुद)– टासी घलेले अखिल नेपाल फुटबल संघ (एन्फा) को मानार्थ अध्यक्षको पदभार ग्रहण गरेका छन् । घले शुक्रबार सातदोबाटोस्थित एन्फा मुख्यालय पुग्दा एन्फा अध्यक्ष कर्मा छिरिङ शेर्पा, महासचिव इन्द्रमान तुलाधरलगायत अन्य पदाधिकारीले स्वागत गरेका थिए ।

एन्फाको कार्यसमितिको मंगलबार बसेको आपतकालिन बैठकले घलेलाई दोस्रो पटक मानार्थ अध्यक्ष मनोनयन गरेको थियो । झन्डै १७ महिना अघि एन्फा केन्द्रिय समितिले घलेलाई बर्खास्त गरेको थियो । घले तेस्रो पटक एन्फाको मानार्थ अध्यक्ष मनोनित भएका थिए । नरेन्द्र श्रेष्ठ एन्फा अध्यक्ष हुँदा घले पहिलो पटक मानार्थ अध्यक्ष मनोनित भएका थिए ।

पछि फेरि शर्पाको नेतृत्वमा निर्वाचित कार्यसमितिले उनलाई दोस्रो पटक मानार्थ अध्यक्ष बनाएको थियो । शेर्पालगायतको प्यानललाई निर्वाचनमा सघाएपछि घले मानार्थ अध्यक्ष बनेका थिए । शेर्पासँग विवाद बढ्दै गएपछि घलेलाई २०७५ माघको ३ गते एन्फा कार्यसमितिले बर्खास्त गरेको थियो ।

घलेले आफुलाई बर्खास्त गरेपछि सुरुमा पाटन उच्च अदालत, राष्ट्रिय खेलकुद परिषद् (राखेप_ र पछि सर्वोच्च अदालतमा उजुरी दर्ता गराएका थिए । सर्वोच्चले राखेपलाई नै एन्फाको यो विवाद मिलाउन आदेश दिएपछि राखेप सदस्य सचिव रमेशकुमार सिलवालले घलेलाई पुनः मनोनयनका लागि एन्फालाई राजी गराएका थिए ।