एजेन्सी – इंग्लिस क्लब म्यानचेस्टर सिटीले आफ्ना जर्मन स्टार विंगर लिरोए सानेलाई क्लबमै राख्नको लागि मनाउने प्रयास जारी राखेको छ । तर, सानेले भने सिटीको थुप्रै प्रस्तावलाई अस्वीकार गरिसकेका छन् ।

साने आफैंले सम्झौता नविकरण नगर्ने र सिटी छाड्न चाहेको बताएका छन् । म्यानचेस्टर सिटीका प्रशिक्षक पेप ग्वार्डिओलाले २४ वर्षीय सानेले क्लब छाड्न चाहेको खुलासा गरे । ‘सिटीले उनको सम्झौता नविकरणका लागि मनाउने प्रयास गरिरहेको छ । उनले धेरै प्रस्तावहरु अस्विकार गरिसकेका छन् । उनी अर्को क्लब जान चाहन्छन् । मलाई थाहा छैन । उनले यसै वा अर्को समरमा क्लब छोड्ने छन्,’ ग्वार्डिओलाले भने ।

सिटीमा सानेको सम्झौता सन् २०२१ सम्म रहेको छ । साने गत सिजनको समरदेखि नै जर्मन क्लब बायर्न म्युनिखसँग जोडिएका छन् । साने सन् २०१६ मा जर्मन साल्केबाट ३७ मिलियन पाउन्डमा ५ वर्षको सम्झौता सहित सिटीमा आएका थिए ।

‘नयाँ सम्झौताको लागि दुई वा तीन पटक कुराकानी भएको छ । जब हामी खेलाडीलाई प्रस्ताव गर्छौं । किनकी हामी उनीहरुलाई चाहन्छौं । उनी विशेष क्षमता भएका खेलाडी हुन् । हामी त्यस्तो खेलाडी चाहन्छौ जसले क्लबबाट खेल्न चाहन्छन्,’ ग्वार्डिओलाले भने, ‘उनी राम्रा मानिस हुन् । म उनलाई प्रेम गर्छु । उनीविरुद्ध मलाई केही भन्नु छैन । तर उनी अर्को चुनौती सामना गर्न चाहन्छन् ।’

चोटका कारण उनी गत अगस्टदेखि नै मैदान बाहिर छन् । उनको खेल दौरान लिगामेन्ट च्यातिएको थियो । उनले यो सिजन सिटीका लागि एक खेल मात्रै खेलेका छन् । सानेको सिटीका लागि १३४ खेलमा ३९ गोल गरेका छन् ।