एजेन्सी – स्पेनिस ला लिगा अनतर्गत शुक्रबारको खेलमा अंक तालिकाको शीर्षस्थानमा रहेको साविक विजेता बार्सिलोना तेस्रो स्थानको सेभिल्लासँग गोलरहित बराबरीमा रोकियो ।

खेलपछि बोल्दै बार्सिलोनाका डिफेन्डर जेरार्ड पिकेले अब लिग जित्न कठिन हुने बताए । ‘अब हाम्रो मात्र नतिजाले लिग जित्न सम्भव छैन । पछिल्लो दुई सातामा जस्तो प्रदर्शन गर्यौं, त्यसको आधारमा लिग जित्न सहज देख्दिन,’ उनले भने ।

पिकेले रियलको प्रदर्शन राम्रो रहेकाले पनि लिग जित्नु आफ्नो हातमा नरहेको बताए । ‘हामी आफ्नो तर्फबाट सक्दो प्रयास गर्नेछौं । हामीले सोचे अनुरुप प्रदर्शन गर्न सकिरहेका छैनौं । मैले रियलको दुवै खेलको नतिजा र उनीहरुको प्रदर्शन हेर्दा उनीहरु यसै पछि पर्ने सम्भावना कम छ,’ पिकेले भने ।

यता प्रशिक्षक किके सेटिनले भने पिकेले सेभिल्लासँग खेलको नतिजा देखेर मात्र यस्तो अभिव्यक्ति दिएको बताए । ‘ उनी खेलपछि निकै दुखि थिए, त्यसैले त्यस्तो अभिव्यक्ति दिएका हुन् । हामीले पहिलो हाफमा निकै खराब प्रदर्शन गर्यौं । मलाई थाहा छ अहिले सकारात्मक सोच आउन कठिन छ, तर भोली उनले पक्कै अर्कै सोच बनाउनेछन्,’ सेटिनले भने ।

सेटिनका अनुसार रियलले लिगका बाँकी सबै खेल जित्ने छैन । ‘मलाई लाग्दैन रियल म्याड्रिडले पनि बाँकी सबै खेल जित्नेछ । सच्चाई यो हो की अब लिग हाम्रो पकडमा छैन, तर यो बदलिन पनि सक्छ,’ सेटिनले भने ।

‘हामीलाई पहिला नै थाहा थियो की बाँकी रहेका सबै खेल जित्न सम्भव छैन । म एक अंक जोडेर सन्तुष्ट छु भन्न खोजेको होइन । तर बराबरी र हारमध्य जसले पनि बराबरी नै रोज्छ,’ उनले टुंग्याए ।