एजेन्सी – ब्राजिलियन डिफेन्डर डेविड लुइजले इंग्लिस प्रिमियर लिगको क्लब आर्सनलसँग सम्झौता नविकरण गरेका छन् । गत सिजन चेल्सीबाट आएका लुइजले एक वर्षका लागि बसाईं लम्ब्याएका हुन् ।

आर्सनलले लुइजसँगै डिफेन्डर पाब्लो मारी र सेड्रीक सोआरेसलाई पनि स्थायी रुपमा अनुबन्ध गरेको छ । मारी ब्राजिलियन क्लब फ्लामेंगो तथा सोआरेस इंग्लिस क्लब साउथह्याम्प्टनबाट लोनमा आर्सनल आएका थिए । रियल म्याड्रिडबाट लोनमा आएका मिडफिल्डर ड्यानि सेबालोसले पनि सिजनको अन्त्यसम्म आफ्नो बसाईं लम्ब्याएका छन् ।

लुइजसँगै अन्य खेलाडी आर्सनलको दीर्घकालीन योजनाको महत्त्वपूर्ण पाटो रहेको क्लबका प्राविधिक निर्देशक एडुले बताए । ‘म यी खेलाडी क्लबसँग लामो समय रहने खबरले खुसी छु । उनीहरु प्रशिक्षक मिकेलको दिर्घकालिन योजनाको पाटो हुन् । उनीहरुले टोलीमा सन्तुलन बनाउन सहयोग गर्नेछन्,’ एडुले भने ।

ब्राजिलका ३३ वर्षीय डिफेन्डर लुइज कोरोनापछि आर्सनलले म्यान्चेस्टर सिटीविरुद्ध खेलेको खेलमा रातो कार्ड पाएपछि आलोचित भएका थिए । तर आर्सनलले भने उनलाई टोलीको महत्त्वपूर्ण खेलाडीको रुपमा हेरेको छ ।

‘डेविड हाम्रो लागि महत्त्वपूर्ण खेलाडी हुन् । उनले जारी सिजन सर्वाधिक खेल खेलेका छन् र महत्त्वपूर्ण भूमिका निर्वाह गरेका छन् । उनको पासिङ, समझदारी र मैदान भित्र र बाहिरको भूमिकाले टोलीलाई सहयोग पुगेको छ,’ एडुले थपे ।