एजेन्सी – अन्तिम २ खेलमा २ अंक जोड्दा रियल म्याड्रिडले यो सिजनको ला लिगा उपाधि जित्नेछ । बाँकी दुई खेलमा बराबरी टोलीलाई उपाधि दिलाउन पर्याप्त हुनेछ । तर टोलीका प्रशिक्षक जिनेदिन जिदान त्यसरी सोचिरहेका छैनन् ।

उनी बिहीबार भिल्लारियलविरुद्ध हुने खेल जित्ने विषयमा मात्र सोचिरहेका छन् । यदि उनले चाहे जस्तो टोलीले भिल्लारियललाई हराएको खण्डमा टोली अन्तिम खेल अघि नै ला लिगामा च्याम्पियन बन्नेछ ।

भिल्लारियल र लेगानेसविरुद्ध हुने अन्तिम दुई खेलमा बराबरीका बारेमा के भन्नुहुन्छ भन्ने प्रश्नमा फ्रान्सेली प्रशिक्षक जिदानको जवाफ थियो, ‘अहिलेका लागि एक मात्र उद्देश्य भनेको बिहीबारको खेलमा ३ अंक जोड्नु हो ।’

उनले आफुले अन्तिम खेलमा बारेमा अहिले नै नसोचेको पनि बताए । ‘हामी बिहीबारको खेल जित्न चाहन्छौं । अहिलेका लागि त्यहि हो । हामी त्यसैका लागि जाने छौं,’ उनले भने, सधै हामी त्यहि चाहन्छौं । भिल्लारियल पनि त्यहि चाहन्छ । ‘

जिदानले अहिले नै च्याम्पियनका रुपमा अनुभव गर्न नमिल्ने बताएका छन् । उनले थपे, ‘के हुन्छ कसैलाई थाहा छैन । रियल उपाधिको नजिक भएपनि जिदान भने जोगिएर बोलिरहेका छन् ।’ शीर्षस्थानको रियल दोस्रो स्थानको बार्सिलाना भन्दा ४ अंकले अगाडि रहेको छ ।

यो पनि पढ्नुहोस : रियललाई आजै च्याम्पियन बन्ने अवसर!