एजेन्सी – इटालियन सिरी ए को साविक विजेता युभेन्टसलाई बिहीबार लगातार नवौं पटक लिग उपाधि पक्का गर्ने सुवर्ण अवसर थियो । तर पहिलो हाफमा अग्रता लिनका बाबजुद टोलीले रेलिगेसनको डर बोकिरहेको उडिनेजेसँग २-१ को हार बेहोर्नुपर्यो ।

खेलपछि युभेन्टसका प्रशिक्षक माउर्जियो सार्रीले टोली शारीरिक र मानिसक रुपमा नै थकित भएकाले अपेक्षित नतिजा निकाल्न नसकेको अभिव्यक्ति दिए । कोरोनापछि लगातार खेल्नुपर्ने अवस्था सिर्जना हुँदा युभेन्टसले २४ दिनको अन्तरमा नै ६ खेल खेलिसकेको छ । सार्रीले लगातार खेल्दा खेलाडीको प्रदर्शनमा एकरुपता आउन नसकेको बताए ।

‘यो समयमा हामी शारीरिक र मानसिक रुपमा नै थकित भएका छौं । यो सबै टोलीमा देखिएको समस्या हो,’ उनके भने, ‘ यस्तो अवस्थामा आक्रामक रुपमा खेल्दा झनै थकान बढेको छ । खेलको अवस्था चाडै बदलिने कारण पनि यसैले गर्दा हो । खेलमा एकै प्रकारको प्रदर्शन देख्न पाइएको छैन ।’

सार्रीले खेलाडीले आफ्नो रणनीति अनुसार नै खेल्न नसकेको पनि बताए । ‘ पछिल्लो समय हाम्रो योजना मैदानमा राम्रोसँग अबलम्बन भएको छैन । पहिलो हाफको प्रदर्शन राम्रो थियो । दोस्रो हाफमा गोल खाएपछि हामीले जसरी पनि जित्ने प्रयासमा गल्ति गर्न पुग्यौं । खेलको अन्त्यतिर गोलकै पछि लाग्दा काउन्टरमा गोल खाएर पराजित हुनुपर्यो ।’

युभेन्टसले अब आइतबार साम्प्डोरियासँगको खेलमा जित दर्ता गरे उपाधि पक्का गर्नेछ । यस्तै टोलीले अर्को महिना च्याम्पियन्स लिगको दोस्रो लेगमा फ्रान्सेली क्लब लियोनसँग पनि खेल्न बाँकी छ । सार्रीले भने अहिले पूरा ध्यान इटालीमै रहेको बताए ।

‘अहिले हाम्रो सोच आइतबारको खेलमा छ । साम्पडोरियालाई हराएर उपाधि पक्का गर्न बाँकि छ । उक्त खेलपछि मात्र हामीले कपको बारेमा सोच्ने हो,’ सार्रीले भने । युभेन्टसले पहिलो लेगको खेलमा १-० को हार बेहोरेको थियो । युभेन्टसले च्याम्पियन्स लिगको क्वाटरफाइनलमा स्थान बनाउन जितको विकल्प रहनेछैन ।