एजेन्सी – इंग्लिस प्रिमियर लिगको यो सिजन आज राति सकिदैछ । प्रिमियर लिगको अन्तिम दिन आज राति ३८औं चरणको सबै १० खेलमा एकै समयमा प्रतिस्पर्धा हुँदैछ ।

लिभरपुलले यो सिजनको उपाधि जितिसक्दा म्यानचेस्टर सिटीले दोस्रो स्थान पक्का गरिसकेको छ । नर्विच सिटी रेलिगेसनमा परिसकेको छ । शीर्ष चार र रेलिगेसनमा समान तीन टोलीको उच्च प्रतिस्पर्धा रहेको छ । म्यानचेस्टर युनाइटेड, चेल्सी र लेस्टर सिटीबीच शीर्ष चारमा तीब्र प्रतिस्पर्धा रहँदा एस्टन भिल्ला, वाट्फोर्ड र बर्नमाउथ पनि रेलिगेसनबाट बच्न संघर्षरत छ ।

आज राति सबै १० खेलहरु एकै समय राति ८ः४५ बजे हुनेछ । १० खेलमध्ये सबैको नजर लेस्टर सिटी र म्यानचेस्टर युनाइटेड तथा चेल्सी र वल्भ्सबीचको केन्द्रित हुनेछ । यही दुई खेलले शीर्ष चारको लागि दुई टोलीको टुंगो लगाउनेछ । म्यानचेस्टर युनाइटेडले लेस्टरको मैदानमा तथा चेल्सीले वल्भ्ससँग बराबरी खेलेपनि शीर्ष चारमा स्थान पक्का गर्दै च्याम्पियन्स लिग खेल्न पाउनेछ ।

युनाइटेड बराबरीमा रोकिएको अवस्थामा चेल्सी विजयी भए हेड टु हेडका आधारमा चौथो टिमको टुंगो लाग्नेछ । चेल्सीले हार बेहोरेमा र लेस्टर युनाइटेडसँग बराबरीमा रोकिएको अवस्थामा लेस्टर गोल अन्तरमा चौथो स्थानामा रहनेछ । चेल्सीले बराबरी खेलेमा र लेस्टर पराजित भएमा चेल्सी र युनाइटेड शीर्ष चारमा रहनेछ । चेल्सी बराबरीमा रोकिएमा लेस्टर विजयी भए युनाइटेड शीर्ष चारबाट बाहिरिनेछ ।

लेस्टरले घरेलु मैदानमा युनाइटेडको आतिथ्यता गर्दैछ । दुवै टोलीको लागि यो खेल ‘गर या मर’ को अवस्थामा छ । लेस्टरले पछिल्लो समय सोचेअनुरुपको प्रदर्शन गर्न सकेको छैन । युनाइटेड प्रिमियर लिगको पछिल्लो १३ खेलमा अपराजित छ । यता, चेल्सीले पनि घरेलु मैदानमा वल्भ्सलाई निम्त्याउदैछ । चेल्सीलाई शीर्ष चारको तथा वल्भ्सलाई शीर्ष ६ भित्र पर्न जित्नै पर्ने दवाव छ ।

आजको खेल

आर्सनलविरुद्ध वाट्फोर्ड (राति ८ः४५ बजे)

बर्नलीविरुद्ध ब्राइटन (राति ८ः४५ बजे)

चेल्सीविरुद्ध वल्भ्स (राति ८ः४५ बजे)

क्रिस्टल प्यालेसविरुद्ध टोटेनहम (राति ८ः४५ बजे)

एभर्टनविरुद्ध बर्नमाउथ (राति ८ः४५ बजे)

लेस्टरविरुद्ध म्यानचेस्टर युनाइटेड (राति ८ः४५ बजे)

म्यानचेस्टर सिटीविरुद्ध नर्विच सिटी (राति ८ः४५ बजे)

न्युक्यासलविरुद्ध लिभरपुल (राति ८ः४५ बजे)

साउथह्याम्टनविरुद्ध सेफिल्ड (राति ८ः४५ बजे)

वेस्टह्यामविरुद्ध एस्टन भिल्ला (राति ८ः४५ बजे)